Баһчуд чаңһ-чиирг болтха гиһәд

Арвн негн җилин туршарт Элст балһсна приставмудын шишлң әңгд Һучна Александр көдлҗ йовна. Бичкнәсн авн хальмг авъяс-заңшал медҗ өсәд, аав-ээҗнь чик сурһмҗ энүнд өгв. Юмнас әәлго, худл келлго, күүнә юм авлго, үлү үзлго, седклән тәвҗ көдлх кергтә, гиҗ аавнь энүнд келдмн.

Эк-эцкнь Ирина Гаряевна болн Вячеслав Иванович дөрвн көвүһән йоста хальмг баатрмудын авцар өскв. Өдгә цагт эдн дөрвүлн зөв-йос харлһна бүрдәцст көдлнә. Дөрвн үрнәннь Күндллһнә һашгудынь, дипломсинь болн нань чигн темдгүдинь Һучна Ирина гертән әрүнәр хадһлҗана.
Һучна Александр Яшкулин района Хар Толһа селәнә дунд сурһуль төгсәһәд, Хальмг ик сурһулин спортын дацңд орҗ сурв. Баһ цагасн авн греко-римск бөк бәрлдәһәр, кикбоксингәр соньмсад болн талдан кесг секцст одад, цогц-махмудан эн батрулв. Чидлтә, төрскнч седклтә, дәәчин заңта көвү өсклһнд дамшачнр Замбан Борис болн Бамбша Василий туслв. Эдндән Александр даңгин ханлтта бәәнә.
Тер мет Һучна Александр «Боевое братство» ветеранмудын Цугәрәсән олна бүрдәцин гешүн болна. Цергә шишлң керг-үүлдврт орлцад, әмнәсн хаһцсн үүрмүд Җаңһр Ивановиг болн Александр Новиковиг даңгин тодлна. Терүнәс нань өөрхн үр Босхмҗин Анатолийтә хамдан орн-нутгт пандемийин цагт медәтнриг, олн үртә өрк-бүлмүдиг хот-хоолар, эмәр болн талдан тоотар теткдг билә. Җирһлин хаалһднь мел энүнлә әдл цаһан седклтә, тевчңгү улс даңгин харһна, гиҗ темдглх кергтә. Өвкнрин авъясар өсч-боссн Александр җил болһн Үрс Сарин әрүн өдрмүдт цер бәрҗ, мах, әрк-чаһр эдллго бийән чикәр бәрнә. Цер бәрхлә күүнә ухан-санан хүврәд, цогц-махмуд батрад, седкл цеврәд бәәснь медгднә, гиҗ Александр келнә.
Хамдан көдлҗәдг үүрмүд дунд Һучна Александр күндллһ болн тоомср олв. Секцст үүрмүднь даңгин ирҗ, энүнә һардврт дамшхдан дурта болна. ЮФО-н приставмудын цергллтсин спортивн багин ханьд Александр бас орна. Олн зүсн марһаст орлцад, даңгин ончрад йовна.
Темдглхәс, Һучна Александр донормудын җисәг дөңнәд, цусан өгч күүнә әм аврна. Дәкәд келхлә, ямр чигн зеткр учрхла Александр нөкд болхар адһна. 2018 җилд мана таңһчд үүлддг Әрәсән ДОСААФ-ин әңгин өөр түүмр шатв. Һазрт кевтҗәсн модна хагсу сала шачала. Бүрдәцин бәәрнд һал күрх гисн әәмшг учрҗала. Александр түргәр түүмриг унтраҗ чадв. Хөөннь ДОСААФ-ин һардвр Һучна Александрт Ханлтын бичг бәрүлҗ өгв.
Александрин кех-күцәҗәдг тоотнь олн, зуг хамгин тааста кергнь бичкдүдиг спортар соньмсуллһн болна. Эн өңгәр дорас өсч йовх көвүд-күүкдиг дамшна. Арвтнрин эк-эцкнрнь бәәр нәәмәдлхд нөкд болна.
Мана таңһчд ирлцңгү шишлң спортивн төв тосхгдхинь Һучна Александр күләҗәнә. – Өдгә цагин некврлә ирлцҗәдг төвд олн арвтнриг спортд орлцулдг арһ учрхмн, – гиҗ эн темдглв.
Тодлхд, 2019 җилд «Харсач» спортивн клубд дөрвн орлцач «STORM» FCF-MMA-2019 нарт-делкән марһанд ончрсмн. Тедниг болхла Һучна Александр белдсн билә.
Иим төрскнч седклтә, һольшг, дәәчин заңта улс приставмудын цергллтд көдлнә. Көдлмшән даавртаһар күцәсн деерән эн дорас өсч йовх арвтнриг спортд орлцулад, баһчудын сурһмҗд ик тәвцән орулҗ йовна.
ОЛЬДАН Цаһан
Зургт: Һучна Александр (зүн таласнь) уйн наста спортсменмүдлә