Сурн бәәҗ цергчин эрдм дасх

«Калмыкия» РИА-н барин төвд дарани брифинг болв. Б.Б. Городовиковин нертә Хальмг ик сурһулин ул деер эн җилин һаха сарин 1-әс авн цергә-сурһулин төв экләд көдлхмн, офицермүдиг энд белдхмн. Эн керг ямаран кевәр күцәгдхин тускар хальмг вузин һардач, биологийин номин доктор Салан Бадм, шин төвин һардач, полковник Дмитрий Марков болн түүнә дарук майор Абушинә Элвг келҗ өгв. Келхд, Дмитрий Анатольевич Марков Кавказд болн Сирийин Арабск Республикд болсн цергә үүлдврт болн Украинд болҗадг цергә шишлң керг-үүлдврт орлцад, Залу –зөргин орденәр ачлгдад, ик дамшлт хоршасн офицер болҗана.

- Әрәсән залврин зааврар тиим төвмүд орн-нутгин цуг регионмудт бүрдәгдсн бәәнә. Тиим даалһвриг Әрәсән Зертә-Зевтә Чидлмүдин инженерин церг өгчәнә. Хамгин түрүнд офицермүд болх баһчудыг цергә кергт дасхх, тер мет хаалһ, олн зүсн шивә тосхлһна, цергә әңгүдиг усар болн электрокүчәр тетклһнә халхар дамшлтарн хувалцх, - гиҗ төвин һардач Дмитрий Марков заав.
- Оютнр цергә эрдмиг 1,5 эс гиҗ 2 җилдән дасх. 2024 җилин мөчн сарин 20 күртл бакалавриатын 1-ч болн 2-ч курсин болн специалитетин 1-ч курсас авн 3-ч курс күртл оютнриг шин төвд орулҗ авх. Элстин цергә комиссариатд теднә эрүл-мендин бәәдлинь шинҗлх, – гиҗ вузин һардач Салан Бадм темдглв.
Хальмг вузд сурн бәәҗ цергә эрдм дасч авхит, тернь әәрмд одснас деер болн амр юмн болҗана гиҗ эк-эцкнр үрдтән селвг өгәд бәәхлә ик туста болхмн, гиҗ Бадм Катинович болн сүүрт орлцачнр селвгән өгв.
Оютнр цергә хамцу өдрин эв-арһар сурхмн. Долан хонгт нег дәкҗ оютнр цергә-сурһулин төвд ирәд цергә белдврән авх, талдан өдрмүдт эдн шүүҗ авсн эрдмән дасх. Цергә төв Элстд Анацкийин нертә проспектин 19-ч тойгта герт бәәршлҗәнә.
Энд сурсна хөөн сержантын эс гиҗ эгл салдсин цол зүүлһәд, цергә билет өгх. Тиим кевәр эдн әәрмд цергләд ирсн салдсмуд болҗ тоолгдх.
Хальмг ик сурһулиг төгсәсн оютнр цергт мордлго дарунь тааста көдлмшт, тер тоод зөв-йосна бүрдәцст, орҗ көдлҗ чадҗана, тер тоод офицерин цол чигн зүүлһәд бәәхнь лавта. Хату цаасан авсн деерән эднд цергә билет өггднә. Бюджетин эс гиҗ бооцана әңгд сурснь йилһл уга цергә эрдмиг оютнр өңгәр дасхмн.
Йирдән 1980 җиләс авн 2008 җил күртл Хальмг ик сурһульд цергә белдвр күцәгдҗәлә. Тер цагин эргцд 3500 офицериг вузд белдлә. Тер кемд хоршасн дамшлт ода чигн олзлгдад, сән белдвртә цергчнриг сурһмҗллһнд нилчән күргхнь лавта.
ТҮРВӘН Һуна