Цергә-төрскнч сурһмҗин төрәр

Одахн Сарпан районд цергә-төрскнч «Зарница» наадна муниципальн девсңгнь төгсв. Тер мет энд Баһ Дөрвдә болн Октябрьск райодын сурһульмудын багмуд дөрлдв. Сурһулин-дамшуллһна белдвр Х.А.Надеевин нертә Уманцевск селәнә дунд сурһулин ул деер болв, энд һурвн района 10-ч классмудын сурһульчнр цуглрв.

Энүг Сарпан района сурһуль-эрдмин залвр бүрдәв, эн кергт района толһач Манҗин Басң дөң болв. Керг-үүлдвр тавн өдртән болв. Эн цергә керг-үүлдвриг сурһульчнрин төлә давуллһнд «Дәәч» гидг таңһчин төв орлцв. Төвин дамшачнрин һардврт көвүд-сурһульчнр цергә белдвр авч, БПЛА-ан нислһнә ул-сүүринь болн топографиг дасч авв. Тер мет «Лазертаг» гидг кергслин дөңгәр дәврлһиг яһҗ күцәхинь «Зарница» наадна йовудт дасв.
Багмуд цергә болн спортын белдврән үзүлв, шав авсн дәәчд түрүн дөң хамгин түргәр кен күргх, автоматыг түргәр кен цуцлад, хәрү цуглулх, кен төвәр хах гиҗ хоорндан дөрлдв»,- гиҗ Сарпан района сурһуль-эрдмин залврин һардач Эрнҗәнә Байр келв.
Йилһән сән орлцачнр дипломсар болн мөңгнә мөрәсәр, дииләчнр болхла Күндллһнә һашгудар, медальмүдәр болн кубокар ачлгдв.
- Цергә наадна һазр белдлһнә олн тоот района толһачин дөңгәр күцәгдв, тер тоод мана залврин дөңгәр цуг орлцачнр сумар, наадна завсрт халун хот-хоолар теткгдв, -гиҗ Байр Александровна цааранднь келв. Йирдән эдн цергә-төрскнч сурһмҗд һол оньг өгчәнә, эн керг цааранднь чигн делгрлт авад бәәх гиҗ эдн тоолҗана. Тегәд ода немр зер-зев болн нань чигн тоот урдаснь сурһульмудын төлә хулдҗ авв.
Тер мет «Санлын сад» гидг керг-үүлдвр давулгдв, көвүд цергә керг-үүлдврин йовудт әмнәсн хаһцсн дәәчнрин санлынь тевчҗ урһа модд суулһв.
Эндр сурһуль-эрдмин залврин күцәҗәдг талдан чигн керг-үүлдврин тускар Эрнҗәнә Байр маднд келҗ өгв. Ода района сурһульчнр ЕГЭ-н болн ОГЭ-н шүүврән өгчәнә. Эднәс дөрвн күн йилһән сәәнәр сурсна төлә медальмүдәр ачлгдх гиҗ күләгдҗәнә. Тер тоод нег сурһульч негдгч девсңгин медаль авхнь лавта. Түүнә төлә хату цааснд зуг «тавн» гидг темдг бәәх зөвтә, ЕГЭ-н шүүврт эсвәр болн орс келәр далнас баһ биш балл авх.
Хойрдгч девсңгин медаль авхин төлә хату цааснд «дөрвн» гидг зуг хойр темдг бәәхмн, тер мет һоллгч хойр кичәлнь 60 баллд үнлгдх зөвтә. Тиим медальмүдәр Сарпан районд, цуг райодт мет, түрүн болҗ йилһән сән төгсәһәчнрән ачлхмн.
Кадрмудын төриг эдн бас чадсарн күцәҗәнә, болв ода деерән эсвин, физикин, англь келнә багшнр күртчәхш. Хальмг ик сурһульд ода төрскн келнә багш биологин багшин немр эрдм авхин төлә шишлң курст сурчана, тер мөңгиг таңһч дааҗана. Тиим болв чигн немр эрдм авх саната багшнр цөөкн: гертәсн холд йовхар седхш, тиигчкәд һурвн-дөрвн җилдән талдан эрдм шинәс дасх кергтә, тернь бас амр биш юмн.
Баһ наста багшнрт өгдг демиг эдн райондан 100 миңһн арслң күртл өөдлүлв, урднь тернь 50 миңһн арслң болҗасмн. Садмудын сурһмҗлачнрт тер дем бас 50 миңһн арслң күртл өсх.
Тер мет патьрар тетклһн, нег үлү Садовое селәнд, бас амр биш төр мөн. Ода района толһач эднә төлә шишлң гер тосххар зуралҗана, болв тер кергнь чигн дарунь күцәгдшго. Йирдән болхла, районд газ, усн бәәнә, селән һазрт чигн сән таал тогтаҗ болхмн. Багшин классмуд чигн ода экләд үүлдҗәнә. Теднә дөңгәр болн селән һазрт бәәдл-җирһлин таал ясруллһна ашт кесг төр күцәҗ болхмн гиҗ сангдна.

ТҮРВӘН Һуна