Эмнлһнь сән болҗана

«Эрүл-менд харлһн» гидг келн-улсин төсвин «Хальмг Таңһчин эрүл-менд харлһна түрүн халхин шинрүллһн» гидг региональн төсвин медлд нидн намр Үстин района Цаһан Амн селәнд поликлиникин ясвр эклсмн. Хальмг Таңһчин Толһач Хаска Бату эмнлһнд бат ясвр кеҗ, әмтнд сән таал тогталһна төр чаңһар бүрткнә. Ясврин көдлмш эн җилин чилгчәр төгсх зөвтә бәәсмн, болв тосхачнр болзгаснь урд цугинь кеҗ дуусв.

Үстин района эмнлһнә ах эмч Церн Теблеевин келсәр, 1986 җилд эдлврт орулгдсн поликлиникд ясвр кегдәд уга бәәсмн. Хальмг Таңһчин Толһач Хаска Бату болн таңһчин эрүл-менд харлһна министр Саран Булат келн-улсин төсвин медлд сән ясвр кех төр хаһлснд ах эмч ик ханлтан өргҗәнә. Ода энд шин терз-үүдд углҗ тәвәд, ораһинь соляд, дулаһар тетклһнә сурвлҗиг шинрүлв. Энд эврә лабораторь, терапевтическ цергллт бәәнә. Района әмтн нааран ирҗ, эрүл-мендин бәәдлән шинҗлҗ, эмнлһ авна.
- Хальмг Таңһчин Толһач Хаска Батун даалһврар мана поликлиникд шин рентген-кергслиг углҗ тәвхмн. Таңһчин Толһачла болсн ил күүндврин йовудт мана района бәәрн күүкд күн кергслиг шинрүллһнә төр босхсн билә, тегәд Бату Сергеевич терүг шинрүлх шиидвр авсмн. Урднь бәәсн кергсл 2006 җилд тәвгдсмн, тегәд хуучрад, гүн шинҗллт кедг арһ уга билә. Шинрүлгдсн поликлиникд «Земск эмч» гидг көтлврин медлд бичкдүдин, рентген болн УЗИ-шинҗллт кедг эмчнр ирҗ көдлҗәхнь темдгтә. Тер мет эн көтлврәр күүкд улсин эмч бас ирхмн. Келхд, рентгенолог эмч урднь Москва балһснд көдлҗ йовла, ода мана эмнлһнд бәәрн улст шинҗллт кеҗәнә. Селәдин болн района эмнлһсин эмчнр гемтә улсин эрүл-мендин шинҗллтин болн ямаран эмнлһ авсна туск то-дигиг шишлң көтлвр олзлҗ темдглнә. Тегәд мана района әмтн таңһчин эмнлһнд одсн цагт эмчнр дарунь терүнә эмнлһнә тускар медҗ чадна, - гиҗ Церн Михайлович келв.
Поликлиникин ясврин көдлмшиг хам-хоша бәәдг Әәдрхнә мүҗин «Промстройконтроль» гидг бүрдәц кесмн. Района эмнлһнә ах эмч, поликлиникин һардач Даван Амулңла хамдан ясврин көдлмшиг бүрткҗ, цугинь цаглань болн сән чинртәһәр күцәгдхиг шинҗлҗ хәләсмн. Келхд, эмнлһнә эргндк һазрт бас сән кец-таал тогтаҗ, модд болн цецгүд суулһв. Поликлиникд района бөдүн улс болн бичкдүд эмнлһ авна, ут тоодан 10 миңһн һар күүнд түрүн дөң күргнә.
БАТАН Сәәхлә
ЗУРГТ: Үстин района Цаһан Амн селәнә поликлиник ясврин хөөн