Номтын нерн зүүлһгдсмн

Сегодня, 12:21 | Общество, Таңһчин зәңгс, Зіњг, Сойл

Элст балһсна 8-ч тойгта дунд сурһуль Очра Номтын нер зүүнә. Эн сурһуль 1963 җилд эклҗ үүлдсмн.
1994 җилд Хальмгин нертә үрнә, номтын, гегән-герлин үүлдәчин нерн зүүлһгдсмн. Тер җилин бийднь эн сурһулин улд сурһуль-эрдмин дамшлтын әңг бүрдәгдсн билә.
Ут тоодан 50 шаху җилин туршарт кесг зун сурһульч энд медрл авч, җирһлин хаалһд орсмн. Улсин эдл-ахун олн-зүсн халхд эдн көдлҗ йовна. Шатрар нарт-делкән гроссмейстер Сюгирә Санан, спортын бөк бәрлдәнә Хальмг федерацин ахлач Балдашинә Владлен болн нань чигн нертә улс эн сурһулиг төгсәсн мөн.
2001 җилд дамшлтын әңг дунд сурһульд хүврсн билә. 2003 җилд сурһульд дәкн нег хүврлт учрв. Эн сурһулин улд Очра Номтын нертә 8-ч тойгта сойлын гимназь секгдв. Хальмг сойл, кел хадһлҗ делгрүллһнә кергт эннь ик чинр зүүсмн. 2017-2022 җилмүдт сурһулиг цааранднь делгрүллһнә көтлвр белдгдсмн. Күцәмҗ бәрхд туслх, багшнрин үүдәгч шунлтднь урмд өгх күслтәһәр тер көтлвр батлҗ авгдсн билә. 2022 җилд болхла эн сурһулин герт бат ясвр кегдв.
Дәәч туурмҗин орн-нутгин сән гисн музейин негнь эн сурһульд үүлднә. «Без срока давности» гидг Цугәрәсән төсвд орлцад темдглгдсн музей сурһульчнрт төрскнч седклин сурһмҗ өгч, күүкд-көвүдиг олна үүлдврт орлцулҗана. Англь келнә багш Элина Утигенова һардҗадг музей шидр Цугәрәсән талвңгин нер зүүв.
Җил болһн хулһн сарин 10-д эн сурһулин багшнр болн сурһульчнр Очра Номтын һарсн өдр темдглнә. Эн сурһуль даңгин делгрлтин хаалһд йовна. Хальмг келн-улсин авъясмудыг өдгә цага сурһуль-эрдмин некврмүдлә ниицүлҗ өдр болһни көдлмштән олзлад багшнр дорас өсч йовдг үйнрт сән сурһмҗ өгчәхнь лавта.
ХӨӨЧИН Галина

Видео