Эрүл-менд харлһна көдләчнриг йөрәҗ ачлв

Маңһдур мана орн-нутгт эрүл-менд харлһна көдләчнр сән өдрин байран темдглхмн. Эрүл-менд харлһна көдләчин эрдм кезә чигн ик дааврта, күндтә болн тоомсрта гиҗ тоолгдна. Өцклдүр Элстд болсн байрин хургт таңһчин эрүл-менд харлһна халхд үнн-чик седклтәһәр көдлҗ йовх улсин ач-тусинь темдглҗ олн ачлвр бәрүлҗ өгв.

Әрәсән эрүл-менд харлһна йилһән сән көдләчин ачлвр авсн улс дунд түргн дөң күрглһнә болн аюлын кемд туслмҗ күргдг медицинә таңһчин төвин һардачин дарук Очра Наталья болн эмч Качкана Любовь, Хальмг Таңһчин ачта эмчин нер зүүсн Цеднә Наталья болн таңһчин эрүл-менд харлһна ачта көдләчин нер зүүсн фельдшер Андра Валентина билә. Наталья Юрьевна һучн шаху җилдән төвд көдлҗәнә, эмч бичкдүдт түргн дөң күргнә. Хамдан көдлҗәдг үүрмүднь энүнә тускар буульмҗта үгмүд келҗ, Цеднә Наталья өөдән мергҗлттә, кергән сәәнәр меддг, байн дамшлтта эмч гиҗ темдглнә. Эн җилмүдин эргцд Наталья Юрьевна кедү бичкдүдт түргн дөң күргҗ, кесгиннь әм аврҗ туслсн болх гинәт! Андра Валентина дөчн шаху җил хооран күч-көлснә хаалһан экләд, бачм дөң күрглһнә әңгд көдлҗәнә. Валентина Боваевна баһ наста көдләчнрлә байн дамшлтарн хувалцҗ, эднд нүдн-амн болҗ сүв-селвгәрн дөңндг төләднь хамдан көдлҗәдг үүрмүднь тевчҗ күндлнә. Цуһар эдн әәмшгтә хальдврта гем түгҗәсн цагт бачм бәәдлд көдлҗ, таңһчин әмтнд түргн дөң күргсмн.
Таңһчин эрүл-менд харлһна халх делгрүллһнд ик тәвцән орулҗ, үнн кевәр үүлдҗ, эмнлһнә чинр өөдлүллһнд тусан күргҗәдг көдләчнриг Хальмг Таңһчин залврин Ахлач Босхмҗин Гилән, Хальмг Таңһчин Улсин Хуралын (Парламентин) Ахлачин дарук Бадмин Вячеслав, Хальмг Таңһчин Толһачин һардврин ахлачин дарук Тарбан Савар, таңһчин эрүл-менд харлһна министр Саран Булат йөрәҗ, өөдән ачлвринь бәрүлҗ өгв.
- Эндр таңһчин эрүл-менд харлһна халхд хойр миңһн дундур күн көдлҗәнә. 2019 җиләс авн эрүл-менд харлһна төрмүдт таңһчин хазнас йилһгдҗәдг мөңгнә кемҗән 40 процентд өсәд, 6,5 җува арслң тогтав. «Земск эмч/фельдшер» гидг көтлврмүдт орлцачнрин то җил ирвәс икдәд йовна. Эн җил Цаһан Амн селәнд поликлиник ясгдв, ода Үстин района эмнлһнд сән таал тогталһна көдлмш күцәгдҗәнә, Городовиковск районд шин поликлиник эдлврт орулгдв, Приютное селәнд 2025 җил күртл бас шин поликлиник тосхгдхмн. Эрүл-менд харлһна көдләчнриг дөңнлһнә керг-үүлдврмүд күцәгдҗәдг болв чигн ода деерән таңһчин эмнлһст 400 көдләч кергтә болҗана. 2028 җилд Хальмг ик сурһулин медицинск дацңгиг түрүн оютнр төгсәһәд, бәәрн эмнлһст күч-көлснә хаалһан эклхмн. Таңһчин эмнлһсиг кергсләр тетклһнә төрт таңһчин һардвр бас ик оньг тусхаҗ, әмтнд өөдән чинртә туслмҗ күргхин төлә цугинь кеҗәнә. Болв гемтсн улст хамгин түрүнд тана цаһан седкл, килмҗ, оньг дарунь эдгхд туслна. Тадн цуһар шүүҗ авсн эрдмдән итклтә, мергҗлтән өөдлүлхәр шундг улс болҗахас иштә таңһчин әмтн сән эмнлһ авч, таднд ханлтан өргнә, - гиҗ Гилән Герасимовна йөрәлин үгдән келв.
Хальмг Таңһчин эрүл-менд харлһна министр сүл цагт ямаран көтлврмүд күцәгдҗәхин, эмнлһсин улыг батруллһна, эмчнрин мергҗлт өөдлүллһнә туст күцәгдҗәдг керг-үүлдврмүдин тускар ахрар келәд, байрин хургт орлцачнриг сән Өдрлә йөрәв. Байрин хургт эрүл-менд харлһна 130 көдләч олн зүсн ачлврар ачлгдв. Таңһчин билгтнр ду-бииһәрн цугтаһинь байрлулв.
ДАВАН Наталья
ЗУРГТ: Хальмг Таңһчин залврин Ахлач Босхмҗин Гилән «Әрәсән эрүл-менд харлһна йилһән сән көдләч» гидг темдгәр ачлгдсн көдләчнрлә