Цергчин эк-эцклә урһа модд суулһв

15-06-2024, 13:08 | Общество, Таңһчин зәңгс, Хальмг Тањєчин Толєачин ґдр-бўр, Зіњг, Эдн Төрскән харсла

Урҗ өдр Хальмг Таңһчин Толһач Хаска Бату Целинн района Вознесеновка селәнд одад, цергә шишлң керг-үүлдврт әмнәсн хаһцсн Антон Гайворонскийин нертә скверт модд суулһв. Хөн сард эн селәнд көдлмшәр ирсн кемд Бату Сергеевич бәәрн улсла харһад, эдниг үүмүлҗәдг төрмүдин тускар күүндсн билә. Цергчин эк Вера Александровна тер харһлтд көвүнәннь санл мөңкрүлхин төлә селәнд сквер секгдснә тускар келсмн. Зуг тенд модд суулһх кергтә гив. Бату Сергеевич дәкн нег нааран ирәд, урһа модд суулһхар үгән өгсн болдг. Келсн үгдән күрәд, таңһчин Толһач хойрдад нааран ирснь тер.

Антон Гайворонский бичкнәсн авн цергч болхар шиидәд, спортар соньмсч, чик авг-бәрцәр бәәсмн. Эн Вознесеновка селәнә дунд сурһулин 6-ч класс төгсәһәд, Краснодар балһснд президентск кадетск училищд орв, тенд йисн җилдән сурв. Хөөннь Новосибирск цергә деед училищиг йилһән сәәнәр төгсәһәд, Чеченск Республикд цергә үүлдврән эклсмн. Цергә шишлң керг-үүлдврт болхла, түрүн өдрәс авн цергә даалһвр күцәһәд, залу-зөрмгән үзүләд, әмнәсн хаһцв. Тегәд нег һазра улснь санлынь мөңкрүлх күслтәһәр төрскн селәнднь нидн Антон Гайворонскийин нертә сквер секхәр шиидсн болдг.
Хаска Бату энүнә эк-эцк Сергей Григорьевичлә болн Вера Александровнала күүндәд, Төрскнәннь төлә әмән өгсн эднә көвүнә баатрлг йовдл мартгдшго гиҗ темдглв. Вера Александровна таңһчин Толһачд Краснодарск кадетск училищин девтр, бәәрн күүкд улс болхла, цергчнрт бийснь кедг хагсасн хот-хол белглв. Тер девтртнь Антон Гайворонскийин санлд нерәдсн бәәрн залу күн Михаил Каземировин шүлг барлата, Бату Сергеевич терүг умшв. Цергчин экин сурврар энд мана йиртмҗлә зокаста сәәнәр урһдг олн зүсн модд суулһгдв. «Төрскән харсачнр» гидг саңгин региональн әңгин һардач, Хальмг Таңһчин Улсин Хуралын (Парламентин) депутат Хаалһин Очр, Целинн района толһач Опин Эрднь, Вознесеновка селәнә толһач Ренат Аккочкаров бас эн керг-үүлдврт орлцв. Келхд, Антон Гайворонскийин һарсн өдр угтҗ (мөчн сарин 14-д һарсмн) модд суулһснь сән йорта йовдл болснь лавта, гиҗ санхмн.
- Эн сквер тана селәнә чидл-күчнә орм болхнь лавта. Энд Төрскән харсгч Алдр дәәнд орлцсн нег һазра улст нерәдсн санлын бумб бәәнә, эн сквер Антон Гайворонскийин нер зүүнә, баһчуд нааран ирх зөвтә. Залу-зөрмгән үзүлсн улсин санл тевчҗ, теднәс үлгүр авч, төрскн һазр-усндан эңкр улс болҗ эдн өстхә. Та көвүндән чик сурһмҗ өгч, зөрмг баатриг өсксн төләд ханлтан өргҗәнәв. Мана цергчнрин санл мөңк болтха, - гиҗ Бату Сергеевич келв.
Вера Гайворонская болхла, көвүнь церглҗ йовсн әңглә бат залһлда бәрҗ, чадсарн дөңгән күргҗәнә. Энүнә седвәрәр нидн селәнд «Цаһан седкл таднд, мана баатрмудт» гидг җисән бүрдәгдв. Селәнә бәәрн улс цергчнрт дулан хувц уйна, өөмс өлгнә, хагсу болн махна зүүтә хот-хол кеҗ һарһна. Вера Александровнан келсәр, эдн 250 шил махна зүүтә хот-хол цергчнрт күргв. Татьяна Куликова болн Елена Петрикова цергчнрт хувц уйна. Эдн Антон Гайворонский церглҗ йовсн әңгд дөң күргдг деерән нег һазра цергчнрт бас килмҗән тусхана.

ДООҖАН Наталья
ЗУРГТ: Хальмг Таңһчин Толһач Хаска Бату Антон Гайворонскийин эк-эцклә урһа модд суулһв

Видео