Ончта йовдлд орлцҗ

Хальмг Таңһчин баһ наста көвүнд эн өдр төрүц мартгдшго. Сансрт ниссн Сергей Рязанский Хальмгин Сарпан района элч Владимир Панасенкод бәрмт цаасинь бәрүлҗ өгсмн.

Әрәсән хотл балһснд болсн «Движение первых» җисәнә наадмд Хальмгин делегац орлцв. Сурһулян сәәнәр сурдг, олна җирһлд шунҗ орлцдг баһчуд мөчн сарин эклцәр Москвад цуглрв.
«Әрәсә» гидг һәәхүл эн наадмин һоллгч талвңгнь болв. ВДНХ-д давсн җилин үкр сарас авн көдлҗәдг һәәхүл орн-нутгин олн келн-улс, ик бичкн уга нааран ирҗ, медрлән, дамшлтан, билг-эрдмән үзүлх таал тогтаҗана.
«Движение первых» җисәнд орлцдг 79 сурһульч наадмд ирв. «Бидн Әрәсән иргнмүд» гидг Цугәрәсән көтлврин кемҗәнд күүкд-көвүдт түрүн иткл цаасан байрин бәәдлд авх арһ учрв. Хөвтә эн баһчуд дунд Хальмгин Сарпан района элч Владимир Панасенко бәәв. Әрәсән Баатр, сансрт ниссн Сергей Рязанский терүгинь Владимирт бәрүлҗ өгв. Ямаран ик байр болв, Хальмг Таңһчин элч төрскндән итклтә иргн болҗ үүлдх андһаран өгв.
ҖИРҺЛИН Кермн