Москвад билгән үзүлв

Әрәсән олн келн-улсин көгҗмин зевсгүдин хамцу ик оркестрин ханьд Хальмг Таңһчин Келн-улсин оркестр Кремлин бәәшңд болсн концертд орлцв.

Орн-нутгин кесг регионас ирсн 200 һар көгҗмч хойр дундур частан эврә келн-әмтнә көгҗмин сәәхниг болн өвәрц тоотыг үзүлҗ чадв.
Хальмг оркестр көгҗмин өвәрцәрн цуглрсн әмтиг өврүлв. Зурһан миңһн күн багтдг бәәрнд хальмг көгҗм күңкнхлә, әмтн зогслго альхан ташад бәәв.
Хальмг улсин көгҗмин зевсгүдин айс ямаран болдгинь, ямр билгтә артистнр тер көгҗмиг олнд медүлҗәхинь Келн-улсин оркестр Хальмг Таңһчин билг-эрдмин ачта үүлдәч Савр Катаевин һардврт сән кевәр үзүлҗ чадв.
ИРҺЛИН Кермн