Дууч Лиҗин Улана санлд

Элстин Петр Чонкушовин нертә билг-эрдмин колледжин театрин әңгин оютнр хальмг дууч болн артистк Лиҗин Улана туск наад тәвв.
Мана медәтнр Сиврт бәәсн муульта цагла, йосна муңхг ухана болн өршәңгү уга седкләс көлтә учрсн тууврин кемлә генткн радиоһар дууч болн театрин артистк Лиҗин Улана дуулсн хальмг ду соңссан тодлна. Тернь Сиврин кесг һазрар бәәсн хальмгудт теңкән уга байр болсмн, омг өгәд, удл уга мадниг сулдхх, төрскн таңһчурн хәрхвидн гиҗ ухалҗасн, олн дунд тер кемд иткмҗинь батрулҗасмн.
Тиим кевәр Лиҗин Улана дуулсн дун сулдхврин туск түрүн докъясин негнь болв. 1956 җилин лу сард тер дууһинь хальмг олн улс соңссмн. 1957 җилин туула сарин 1-д Хальмг Таңһчиг шинәс босхлһна СССР-ин Деед Советин зәрлг һарсмн. Дәәнә өмн Лиҗин Улан Хальмг драмин театрт көдлҗәлә, кесг нааднд орлцҗала, театрин нүүрлгч артистнрин негнь бәәсмн.
Дәәнә өмнк сәәхн цагиг Улан Барбаевнад нерәдсн наадндан Элстин билг-эрдмин колледжин театрин әңгин 1-ч курсин оютнр үзүлв. Улан Әәдрхнә театрин студьд артистин эрдм дасчана. Түүнлә хамдан Хальмг театрт көдлҗәсн артист Җимбин Бадм 1942 җил олнд темдгтә «Нүүдлә» дууһан бичв. Тер дууг түрүн болҗ артистк болн дууч Лиҗин Улан Әәдрхнд фронтд йовҗасн салдсмудт болн хөөннь Элстд ирәд олн-әмтнә төлә дуулҗ өгв. Цугтаднь дун икәр таасгдв.
Тер мет Буханкин Бадм үүдәсн «Деләш» дууг Улан дәәнә өмн дуулҗ йовла. Цуг тер дууднь «Мелодия» фирмин пластинкд бичәд олн улсин төлә һарһгдсмн.
Чонкуша Петрин нертә билг-эрдмин колледжин театрин әңгин оютнр Улана бәәдл-җирһлин, тер цага баһчудын үүдәгч арһ-күчинь сәәнәр үзүлҗ чадв. Негдгч курсас авн эдн эврәннь багш Эрнҗәнә Лилиян һардврт артистин амр биш эрдмиг экләд дасчана, тиим ончта билг-эрдмтә, теднд үлгүр болх нертә артистк болн дууч Лиҗин Улана тускар олн улсин зүркинь авлҗ, ахр наадна болзгт үзүлв.
Тернь эднә түрүн ончта күцәмҗнь болҗана, тәәз деер һархд күнд, терүн деер билг-эрдмән үзүлхд улм амр биш болдгнь медгдҗәнә. Болв тернь олн-әмтнд үзүлсн түрүн наадн болҗана. Зәрм хәләһәчнр нүднәснь һарсн нульмсан арчн, альхан ташҗ, баһчудт ханлтан өргәд бәәв. Улан Барбаевнад нерәдсн наадыг цааранднь өргҗүләд тиим кевәр дипломин нааднд терүг хүврүлҗ болҗана.
Наадна түүрвәч Әлксән Тимофей кесг үүдәврән Лиҗин Улана үүдәлтд нерәдлә, тегәд эн наадн чигн әмтнд ик тааста болв, Хальмг АССР-ин олн улсин артистк Лиҗин Улана алдр неринь, ховр билг-эрдминь дәкәд нег тодлулв.
Тер кергиг күцәсн колледжин оютнрт күцәмҗ дурдҗанавидн, хаалһнь цаһан, билг-эрдмнь олн улсин седкл авлдг улм нәрн сәәхн авцта болтха. Артист болх седкл, хәләһәчнрин оньг авлдг билг эднд бәәнә, ода зуг багшин һардврт дамшлтан хоршаһад, билгән хурцдулад бәәх кергтә.

ТҮРВӘН Һуна