Москвад билгән үзүлв

А. Цебековин нертә Хальмгин государственн хор ик күцәмҗтәһәр Москвад мөчн сарин 13-д билгән үзүлв. «Иргчин аһу»: «Өмн үзгин макрорегион» гидг презентацд Хальмгин дууна коллектив орлцв. «Әрәсән Өмн үзг» гидг сойлын эн төсв «Әрәсә» гидг ВДНХ-д үүлдҗәх нарт-делкән форумин кемҗәнд болсмн.

Хальмгин Государственн хорин художествен һардач, Хальмг Таңһчин билг-эрдмин ачта үүлдәч Ольга Сердюкова терүнд «Тууҗин холас иргчүр» гидг төсвиг олна оньгт тусхав. Олн халхта үүлдвр күцәдг баһчудын цутхлңгин төсвин тускар цәәлһвр өгәд, Советск Союзин Герой Басан Бадьминович Городовиковин нер зүүҗәх цутхлң өдгә цага цуг некврт ирлцхин тускар Ольга Владимировна келҗ өгв. Мана таңһчин нерн деерәс үзүлгдсн дәкн нег төсв «Башантинск яарм» гидг бәәрниг бәәцин халхарнь ясч шинрүллһнлә залһлдата төсв. «Ноһан Дәрк» гидг сойлын-гегән- герлин комплексин тускар чигн Ольга Сердюкова презентацин йовудт тодрхаһар келҗ өгв.
«Әрәсә» гидг форум-һәәхүлин талвңгд Хальмгин дууна коллектив үзүлсн концертиг әмтн икәр таасч хәләв. Дуучнр Айса Брюгидикова, Лиджи Гаряев, Анна Очкаева дуулсн дун болһн шуугҗ-ниргҗ тосгдҗав.
Басңга Баатрин нертә Келн-улсин театрин артист Санджи Пурсяков Хальмгин туск викторин бүдәснд олн күн орлцҗ, кесгнь теегин һазрин туск медрлән үзүлҗ, белгүд шүүҗ авв.
Дууна коллективин эрдмиг өөдән үнләд, цуглрсн әмтн артистнрт ханлтан медүлв.

ҖИРҺЛИН Кермн