Көгҗмәр дүүрсн асхн

Эн җилә хөн сарла А. Цебековин нертә Государственн хор дарани концертан үзүлснь олнд ик таасгдла. «Көгҗмәр дахулҗ, чинрнь өссн үг» гиҗ нерәдгдсн концертд классическ көгҗмин үүдәврмүд олн хәләһәчнрин оньгт тусхагдв.

Көгҗмин сәәхн айсар дүүрсн концертд Щедрин, Фалик, Рябов, Леденев бичсн үүдәврмүдиг дууна коллектив соңсачнртан нерәдв. Әмтнә тааслт олдг шүлгчнрин - Блокин, Северянина, Есенина, шүлгүдәр бичгдсн дуудыг эн өдр олн соңсачнр байрлҗ соңсв. Андрей Вознесенскин шүлгәр һарһсн дун чигн эн асхн дуулгдв. Көгҗмин болн шүлгин таарлт негдсн үүдәврмүдиг дууна коллектив болн дуучнр айсинь эвтнь орулҗ, шүлгин утхинь медүлҗ дуулв.
Манҗин Аркадин көгҗм концертд зөвтә орман эзлв. Хальмгин нертә композитор келн-улсин, классическ айсмудар көгҗмән дүүргсн деерән олнаннь чигн янзд оньган өгдг бәәсинь концертд ирсн әмтн йир сәәнәр медҗ авв. Дуучнр ханярн дуулдг коллективин төлә бичсн өвәрц һурвн үүдәврлә әмтн таньлдв.
Финск шүлгч Эдит Сёдергран бичсн шүлгүд Манҗин Аркадин чееҗд орад, көгҗмин тер үүдәврмүдән эн бичсн болдг. Иигәд көгҗмин эн асхн шүлгүдин делкәд орх таал ирсн олн улст учрв.