Санлын концерт

Төрскән харсгч Алдр дән эклсн мөчн сарин 22 өдриг угтад, Элстд көгҗмин-шүлгләнә наадн әмтнә оньгт тусхагдв. Манҗин Аркадин нертә Хальмг госфилармоня, Басңга Баатрин нертә Келн-улсин театрин артистнр дән эклсн өдриг тодлулад, дәәнд әмнәсн хаһцсн зөргтә баатрмудын санлд терүгән нерәдв. Эн үүлдврт «Академия талантов» гидг сойлд болн билг-эрдмд дөң болдг төвин бичкн артистнр бас орлцв.
Элстин Баатрмудын аллейд Мөңк һалын өөр санлын эн керг-үүлдвр болв. Дәәнә цага дуд дуулгдв, шүлгүд эн өдр умшгдв. Алдр эн дәәнд Төрскнәннь төлә әмән әрвллго дәәлдсн цергчнрин санлд нерәдҗ, ветеранмудыг тевчҗ, эн керг-үүлдвр күцәгдв. Р.Рождественскийин, А. Твардовскийин шүлгүд, дәәнәс бичсн бичгүдин зәрм халхс советск әмтн ниитәһәр бәәҗ, хортна өмнәс боссн цагиг тодлулв. Цевгә Төлән нертә Государственн хор, Хальмгин симфоническ оркестр, Хальмг Таңһчин ачта артистнр Очкан Анна, Наталья Спивак, Инесса Месхишвили, дууч Дорҗинә Лиҗ, Хальмг Таңһчин ачта артист Такан Очр, артистнр Эрднин Очр, Баазра Санҗ, нань чигн артистнр орлцв.
Көгҗмин-шүлгләнә наадна режиссер болҗ Хальмг Таңһчин ачта артист Пурсякә Санҗ үүлдв.
Төрскнәннь төлә, эндрк хөвтә җирһлин төлә әмнәсн хаһцсн баатрмудын санлд нерәдсн керг-үүлдвр мөчн сарин 21-д Мөңк һалын өөр болв.
ҖИРҺЛИН Кермн