«Тюльпанчик» марһанд ончрв

Е. Толкачевин нертә бичкдүдин бииһин «Тюльпанчик» ансамбль Ростов-на-Дону балһснд билг-эрдмән үзүлв.

«Бидн - Әрәсә» байрин ик концертд хальмг биичнр орлцв. Әрәсән өдрт нерәдсн олн керг-үүлдврмүд дунд эннь йир ке-сәәхн болн чинртә байр болв. Әрәсән өмн үзгт бәәдг олн келн-улсин билг-эрдмлә эн концерт таньлдулв.
ЮФО-н хамгин сән үүдәгч коллективсин тоод «Тюльпанчик» хальмг бииһин өвәрциг үзүлв. Ростовск мүҗин сойлын министерствин үрврәр бичкн биичнрин хальмг коллектив тер байрин концертд орлцсмн. Иньгллтин сәәхн эн нәәрт Донецк болн Луганск Улсин Республикүдин коллективс чигн орлцсинь заахмн.
Терүнә өмн «Тюльпанчик» Кыргызстанд болсн бичкдүдин нарт-делкән наадмд орлцад ирсмн. Бишкекд болсн бичкн билгтнрин ик нәр хальмг артистнрт тодлгдсна тускар ансамблин һардач Нарна Заяна келв. Кыргызстана филармоня бәәрнд болсн түрүн концертас авн Хальмгин бичкн билгтнр бииһин цуг сән тоотан йир сәәнәр үзүлҗ чадв.
Ансамблин художественн һардач Людмила Толкачеван келсәр, бичкн биичнр концертд билгән үзүлсн деерән Кыргызстана нертә артистнр бүрдәсн мастер-классмудт орлцҗ чадв. Бичкн биичнрин нань чигн олн коллективслә таньлдҗ, олн келн-улсин кесг би үзв.
Өмн үзгин Корейин, Казахстана, Сербин, Моңһлын, Түрг нутгин, Китдин, Таиландын, Узбекистана болн нань чигн орн-нутгудын элчнр билгән үзүлв.
Наадмин йовудт «Ойратские наездницы» гидг шин бииһән «Тюльпанчик» түрүн болҗ үзүлв. Очкан Борис көгҗмәр бииг Хальмг Таңһчин болн Әрәсән ачта артист Эрднин Валерий белдҗ тәвсмн.
Йиртмҗин сәәхн һазрт одад, билг-эрдмән үзүлсн хальмг биичнр ик байрта бәәнә. Биич Алтана Шипиеван тодлврар, Кыргызстана һазр йир таасгдв, талдан һазрин олн биичнрлә таньлдад, цаарандк үүлдвртән урмд авсн ирвидн. Моңһл болн хасг би эднд таасгдсна тускар бичкн артистнр келнә. Эн наадмин хөөн «Тюльпанчик» Хазнд билг-эрдмән үзүлв.
ҖИРҺЛИН Кермн