Театрмудын хәләврт орлцв

Басңга Баатрин нертә Келн-улсин театр дарани нарт-делкән наадмд одад ирв. «У Троицы» гиҗ нерәдгдсн театрмудын эн хәләврт Хальмг театр «Я – Будда» гидг наадан үзүлв.

Сергиев Посад балһснд мөчн сарин 14-д театрмудын ик чинртә хәләврт Басңга Баатрин нертә Келн-улсин театр «Я - Будда» гидг наадан жюрин болн олн хәләһәчнрин оньгт тусхав. Хальмг артистнрин наадыг әмтн соньмсч хәләв. Урднь чигн талдан театральн марһаст орлцҗ, эн наадан үзүлсн артистнр Оюни ик багшин болн терүнә ухани зөөрин тускар медүлхәр зүткв.
Келхәс, эн наадм арвдгч кемдән болв. Театрмуд терүнә тускар меднә. Күмни сә хәәгч үүдәврмүдлә, гүн учр-утхта нааддла наадм таньлдулдгнь сән авъяс болсмн. Әрәсән сойлын болн тууҗин йовдлмуд үзүлгч нааддыг эн наадмд өргнәр үзүлнә.
«Театральный ковчег в Дубраве» гидг нертә тәәз деер түрүн болҗ иим өвәрц наадн үзүлгдсн болх. «Я - Будда» гидг нааднд Алдр Багшин җирһлин хаалһин тускар келгдҗәнә. Бурхн Багш болсн Сиддхартха Гаутама номин хаалһд яһҗ орсинь, күмни сә хәәгч сурһаль яһҗ үүдәсинь артистнр болн режиссер Манҗин Борис наадндан үзүлҗ чадв.
«Я - Будда» - көгҗмин поэм Басңга Баатрин нертә Келн-улсин театрин хамгин чинртә наадн болҗана. Наадна сценарин түүрвәчнр Хальмгин болн Әрәсән билг-эрдмин ачта үүлдәч Манҗин Борис, Хальмг Таңһчин улсин артист Хаптхан Виктор, наадна көгҗминь Хальмгин баатр, көгҗмч Манҗин Аркадь бичсмн.
ҖИРҺЛИН Кермн