Нөкцлтин бооца батлв

20-08-2024, 10:54 | Политика, Таңһчин зәңгс, Зіњг

Хальмг Таңһчин Олна палат намртан болх суңһврт белдвр кеҗ, олна бүрткәчнриг белдлһнә, олна бүрдәцслә болн партьсла бооца батллһна көдлмшиг цааранднь күцәҗәнә. Шидр Олна палатын улд үүлддг олна бүртклһнә штабд «Негдсн Әрәсә» партин Хальмг региональн әңглә нөкцлтин бооцан батлгдв. Бооцанд Әрәсән Федерацин Хүүвин гешүн, «Негдсн Әрәсә» партин Хальмг региональн әңгин сегләтрин негдгч дарук Байир Путеев болн Хальмг Таңһчин Олна палатын ахлач Батыр Мучаев һаран тәвв (зургт).
- Бидн таңһчд үүлддг олна бүрдәцслә нөкцлтин бооца батллһна керг-үүлдвриг төгсәһәд, суңһврт орлцҗадг партьсла ирлцңһү бооца батлҗанавидн. Олна бүрдәцслә болн партьсла хамцу үүлдврин бооца батлсн деерән олна бүрткәчнриг белдллһнә көдлмш күцәҗәнәвидн. Намртан 600 олна бүрткәч суңһврин йовудыг бүрткх гиҗ зуралҗанавидн. Суңһврин әңг болһнд эдн һурвн өдрин туршарт үүлдҗ, цугнь дигтә-даратаһар давхиг шинҗлхмн. Нөкцлтин бооца батлсна ашт мана таңһчд суңһврин йовуд ил кевәр давҗ, олн әмтн бүртклһнә керг-үүлдврт орлцхд туслхмн, - гиҗ Батыр Иванович темдглв.
Байир Путеев Олна палатын ахлачд ханлтан өргҗ, эдн урднь чигн хамцу үүлдҗ, суңһврин йовудыг бүртклһнә кергт хамдан орлцсиг заав. «Мана кандидатнр цуһар күндтә болн тоомсрта улс болна, тегәд олн-әмтн суңһврин йовудыг бүрткҗ, цугнь үнн кевәр давхиг шинҗлҗ хәләхнь сән йовдл болҗана. Мана таңһчд суңһврин кем ил кевәр бүрдәдгиг олна шунлт герчлҗәнә», - гиҗ Байир Эдуардович келв.

ДООҖАН Наталья

Видео