Төрскн келнә багшнр марһлдхмн

Урднь хальмг келнә багшнр зуг таңһчин кемҗәнд хоорндан дөрлдҗ йовла, ода болхла Әрәсән кемҗәнд чигн эдн марһлдҗана. Сүл җилмүдт келн-улсин республикүдт төрскн кел даслһна төрәр икәр соньмсчана.

Ода таңһчин мергҗлтнр «Төрскн келнә болн утх-зокъялын йилһән сән багш» гидг Цугәрәсән марһанд орлцҗана. Җил болһн тиим марһан бүрдәгднә, некврнь өсәд йовна, түүнә ашт төрскн кел дасхлһна кемҗән өөдлҗәнә, эв-арһснь чигн ясрҗана. Шин тоотыг, олн зүсн шинрлтиг олзлдг багшнрин дамшлтыг марһанд йилһҗ авх күсл тәвгдҗәнә.
2023 җилд Цугәрәсән марһанд йилһән сән багшин болн «Сурһульд орад уга күүкдин төрскн кел делгрүллһнә йилһән сән дамшлт» гидг нертә талвңгудт ДОУ-н мергҗлтнр марһлдв.
Давсн җилд Яшкулин района Улан Эрг селәнә дунд сурһулин хальмг келнә болн утх-зокъялын багш Долган Байрта Цугәрәсән марһанд ик күцәмҗ бәрв. 72 багш дундас йилһән сән 15 мергҗлтин тоод орад, марһана лауреатын өөдән нер зүүв.
2024 җилд хальмг келнә багшнр «Хальмг Таңһчин йилһән сән багш» гидг марһана йовудт дөрлдв. Дииләчнрин күндтә тоод Элстин 2-ч тойгта сурһулин хальмг келнә болн утх- зокъялын багш Канан Надежда болн хотл балһсна 24-ч тойгта садын немр сурһулин багш Балакан Екатерина орв. Ода эдн Цугәрәсән марһанд белдҗәнә, тернь Хазн балһснд һаха сарин 15-ас авн 21 күртл болхмн. Тенд эн хойр дииләч Хальмг Таңһчиг элчлх.
«Ода марһанд белдлһн түргн йовудтаһар күцәгдҗәнә. Тер тоод бүрдәмҗин семинармуд Цугәрәсән марһанд орлцачнрин төлә давулгдҗана. Таңһчин сурһуль-эрдмин болн номин министерствин мергҗлтнр цуг цәәлһвриг өгнә. Олн зүсн төрәр тоолврарн хувалцҗ, хамгин өөдән ашт күрхәр седҗәнәвидн, тер ашнь һаха сарин чилгчәр медгдәд бәәх, – гиҗ Балакан Екатерина келнә.
Сурһмҗлачнр болн хальмг келнә багшнр бичкдүдт өгдг медрлиг цааранднь сурһульд, олна керг-үүлдврт өргнәр олзлх кергтә, тиим неквр бәәхлә,эдн төрскн келән мартшго, гиҗ таңһчин марһана дииләч, Элстин 24-ч тойгта садын мергҗлт келснь чигн орта болв.
Ода Бурхн багшин Алтн сүмд хальмг келнә кичәлмүд давулна, тер керг-үүлдвриг бас өргҗүлх кергтә. Яһад гихлдә баахн эк-эцкнр төрскн келән мууһар меднә, бичкдүдтән дөң болҗ чадхш гиҗ сурһмҗлачнр келнә.
Элстин 2-ч тойгта сурһулин хальмг келнә багш Канан Надеждан үгәр, ода эдн тасрхан угаһар Цугәрәсән дааврта марһанд белдҗәнә. Түүнә төлә төрскн келнә кичәлин, классин часин, мастер-классин зура бичҗәнә. Үүмән чигн бәәнә, яһад гихлә бидн мана таңһчиг, төрскн келән болн эврә бүрдәцән һутах зөв угавидн, гиҗ багш тоолҗана.
«Марһана йовудт бидн талдан регионмудын багшнрла таньлдад, эврәннь дамшлтан, олзлдг ховр эв-арһан үзүлхвидн, түрүн болҗ тиим ик марһанд орлцҗанав, тегәд байрта-бахта кесг йовдл чигн учрх, гиҗ нәәлҗәнәв. Тегәд Хазнд ирхән теңкән угаһар күләҗәнәв, этносойлын ик нәр-наадн тенд болх гиҗ урдаснь зәңглгдв. Олн келн-улсиг багтаҗадг, олн кел болн сойл делгрүлҗәдг эң-зах уга мана орн-нутг цуг орлцачнрин төлә бахмҗ үүдәх» - гиҗ Канан Надежда бат итклтә бәәнә.
Хойр мана элч бас сән гисн 15 багшин эс гиҗ садын көдләчин тоод орхар күсл тәвҗәнә. Түүнә төлә эврә дамшлтан, соньн эв-арһан үзүлх кергтә, тиигхлә ашнь күцәмҗтә болх, гиҗ эдн тоолвран келнә.
Элстин 2-ч тойгта сурһульд кесг келн-улсин күүкд сурна, Надежда Менкеевна эднд хальмг кел дасхна, наадна кесг эв-арһиг кичәлдән олзлна. Сурһульчнрнь сән медрләрн ончрна, балһсна болн таңһчин төрскн келнә олимпиадт күцәмҗ бәрнә.
Сурһулин һардачин седвәрәр бичкдүд болн арвтнр тууврин туск наад хальмг келәр үзүлсмн, тиим үүлдвр күүкдиг соньмсулна, тегәд 2-ч тойгта сурһульд театрин үүлдвриг өргҗүлҗ болҗана гиҗ сангдна. Нег үлү ода Әрәсән гегән-герлин Министерств эн кергт онц оньг өгчәнә.
Хазнд болх Цугәрәсән марһанд сәәнәр белдәд, мана таңһчин элчнр сән күцәмҗ бәрх гиҗ бидн нәәлҗәнәвидн.

ТҮРВӘН Һуна
Зургт: Канан Надежда сурһульчнртаһан