Хальмгин элчнр эрлһән орулв

«Медрл.Лектор» гидг Цугәрәсән марһанд Хальмг Таңһчас 32 күн эрлһән орулҗ, ниицәнә медлд сурһулин керг-үүлдврмүдт орлцх зөв авх санаһан медүлв. Мана орн-нутгин регион болһнас ут тоодан 19610 күн терүнд орлцҗана. Ноха сарин 20-әс авн үкр сарин 14 күртл болх региональн девсңд 1500 бөдүн күн болн оютн орлцҗана. Марһанд орлцачнр «Медрл» гидг Әрәсән олна ниицәнә бәәрн әңгүдин дөңгәр региондан лекцс умшҗ, онлайн кевәр болх күүндврт шинҗләчнрлә харһҗ, бийиннь тускар келҗ өгхмн.
Хальмг Таңһчд эн марһанд 32 күн орлцҗ, олна ниицәнә лектор болҗ үүлдхәр зуралҗана. Эдн нурһлҗ тууҗин болн тууҗлгч санл хадһллһна, сурһуль-эрдмин, билг-эрдм делгрүллһнә төрмүд шүүҗ авв. «Медрл» гидг Әрәсән олна ниицәнә һардач Максим Древалинә темдглсәр, марһанд орлцачнр дунд өнр-өсклң өрк-бүлд өссн эс гиҗ бийснь олн үртә эк-эцкнр болҗадг улс орлцҗана, эдн эврәннь үлгүрәр өрк-бүлин, дурна, итклин чинрин тускар медүлҗ, дамшлтарн хувалцҗана. Марһанд орлцачнр дунд 14 наста бичкдүд болн 75 наста медәтнр чигн бәәнә, эдн селәнә һазрт болн ик балһсдт бәәдг улс болна. Эдн дунд олн зүсн халхар үүлддг улс бәәнә, тер тоод ховр эрдмтә улс бәәдгнь илдкгдв. Үлгүрнь, Арктикин шинҗләч, эмнлһнә клоун, көгҗмин зевсгүд ясдг, Го наадын спортын мастер болн нань чигн улс мөн.
«Медрл.Лектор» марһанд орлцачнр «Медрл» гидг Әрәсән олна ниицәнә лектормудын ханьд орҗ, гегәрлтин керг-үүлдврмүдт орлцх зөв авхмн. Бөдүн улс болн оютнр дунд диилвр бәрсн 70 күн 250 миңһн арслңга мөрәһәр ачлгдхмн. Тер мөңгиг эдн гегәрлтин болн сурһуль-эрдмин керг-үүлдврмүд күцәлһнд олзлхмн.
ДАВАН Наталья
ЗУРГТ: «Медрл» гидг Әрәсән олна ниицәнә лекц болҗах кем