ЛНР-ин бичкдүдлә харһв

27-08-2024, 10:31 | Общество, Таңһчин зәңгс, Зіњг, Эдн Төрскән харсла

Давсн долан хонгин чилгчәр мана таңһчур Луганск Улсин Республикин Антрацитовск районас бичкдүд ирв. Хальмг Таңһчин Улсин Хуралын Ахлач Артем Михайлов бичкдүдлә харһад, зака үүдәгч бүрдәцин үүлдврин тускар келҗ өгв. Хаврар Элстд ЮРПА-н хургин йовудт Хальмг Таңһчин Улсин Хуралын (Парламентын) болн ЛНР-ин Антрацитовск муниципальн округин Хүүвин хоорнд нөкцлтин бооцан батлгдсн билә. Тегәд депутатнр Антрацитовск района бичкдүдин төлә мана таңһчур зуульчллһиг бүрдәв.
Ут тоодан 29 күүкн-көвүн: эдн дунд цергә шишлң керг-үүлдврт орлцачнрин болн терүнд әмнәсн хаһцсн, улсин бичкдүд, сурһулян йилһән сәәнәр сурдг болн олна бәәдл-җирһлд шунмһа орлцачнр ирв. Ода эдн Городовиковск района «Березка» лагерьт амрчана.
Артем Михайлов Улсин Хуралд бичкдүдлә харһад, Антрацитовск районас мана таңһчур гиичнрт ирхлә, цуһар байрлна гив. «Мана регионмуд хоорндк иньгллтин залһлдаг делгрүлхин төлә тадниг тосч, авсн деерән бидн цуһар нег орн-нутгт бәәдг улс болҗахиг медүләд, тадниг дөңнхин төлә иим харһлт бүрдәгдв. Мана таңһчд сергмҗтәһәр амрад, энд олн үр-иньгүдтә болад, Хальмгин һазриг тодлҗ йовтн», - гиҗ Артем Васильевич келв. Харһлтын йовудт бичкдүд бәәдл-җирһлиннь, сурһулин, амрлһна тускар ухан-тоолврарн хувалцв.
Үдин хөөн бичкдүд «Дәәч» гидг цергә-спортивн белдврин болн төрскнч сурһмҗин Төвд одад, сурһулин хорас хәләҗ, багшнрла күүндв. Күндтә гиичнриг Улсин Хуралын депутатнр Җаңһан Чимид, Дорҗин Артур болн Пүрбән Олег тосв. Тер өдрин бийднь бичкдүд Бурхн Багшин Алтн сүмд одв, «Иньгллт» паркд амрв.

ДООҖАН Наталья
ЗУРГТ: Антрацитовск района бичкдүд «Дәәч» төвд ирв

Видео