Театрт бат ясвр кех

Әрәсән залвр «Сойл» келн-улсин төсвин йовудт эн җил регионмудын театрмудт болн музеймүдт бат ясвр келһнд немр 1,8 җува арслң йилһхмн. Эннь сойлын бүрдәцсиг шинрүлҗ сән таал тогтаҗ, регионмудт зуульчнр олар ирхд туслхмн, гиҗ орн-нутгин залврин Ахлач Михаил Мишустинә зааврт келгдҗәнә.
Сойлын бүрдәцст бат ясвр келһнд немр мөңг авх регионмуд дунд Хальмг Таңһч бас заагдв. Шаңһас йилһгдх 20 сай 597 миңһн арслң Басңга Баатрин нертә Келн-улсин театрт бат ясвр келһнд һарһгдхмн. Хальмг Таңһчин сойлын болн зуульчллһна министерствин зәңглсәр, театрт инженерн сүлҗән шинрүлгдхмн. Театр эдлврт орулгдснас авн энд дулаһар тетклһнә, усна, электрокүчнә сурвлҗн сольгдад уга, тер мет энд зәрм үүдд-терзмүд шинрүлхмн, нань чигн ясврин көдлмш күцәгдхмн.