Сурһулин шин җил өлзәтә болтха!

02-09-2024, 14:12 | Общество, Таңһчин зәңгс, Зіњг, Сурєуль-эрдм

Нөкәдүр, һаха сарин 2-т, таңһчин сурһульчнр болн багшнр Медрлин өдр темдглхмн, тиим кевәр 2024-2025 җилин сурһулин шин җил эклх. Эн өдр Элстин болн райодын сурһульмудт байрин нәр болхмн. «Чинртә юмна туск күүндвр. Иргч ямаран болхмб? Медрлин өдрт нерәдҗ» гисн төрәр сурһульчнрла күүндвр болхмн.

Урдаснь кесн то-дигәр Хальмг Таңһчин сурһульмудын негдгч классмудт эн җил 3250 һар бичкдүд ирх.
- Мана Хальмг этносойлын гимназьд һаха сарин 2-т негдгч дөрвн класст 100 бичкдүд орх, тер тоод 1 «а» классин сурһульчнр София Золотухина болн Санган Алтан (зургт). Теднә төлә сурһулин цуг таал белдгдсн бәәнә. Мана сурһулин гер, 2017 җилд тосхгдла, шин җиләс авн гимназин ул деер немр сурһулин «Кванториум» гидг төв үүлдх, энд зәңгллһнә, физикин, химийин, биологийин медрлиг улм гүүнәр дасч болхмн, балһсна талдан бүрдәцсин сурһульчнр энд медрлән гүүдүлҗ чадх, - гиҗ гимназин һардач Лиҗин Елена келв.
Давсн сурһулин җилд гимназиг 56 күн төгсәв. Тер тоод алтн медаляр ачлгдсн Максим Косыченко химийин ЕГЭ-н шүүвриг 100 балл хоршаҗ өгв. Ода Максим Москван экономикин ик сурһульд сурхмн.
Тер мет Цернә Эңкр бас алтн медаляр ачлгдад, М.Ломоносовин нертә МГУ-н физикин дацңд орв. Эңкр арвн негн җилин туршарт йилһән сәәнәр сурч, олимпиадмудт орлцҗасмн.
Сурһулин шин җиләс авн күүкд «Күч-көлсн» гидг шин кичәлд ордг болх, соньн олн тоот тер тоод робототехникиг дасх. Хальмг ик сурһульд тиим багшнриг белднә.
Тер мет ОБЖ кичәлин ормд «Әәмшг уга бәәлһнә ул-сүүр болн Төрскән харслһн» гидг кичәл давулгдхмн. Цааранднь келхлә, эдн эврә таңһчин тууҗиг бас дасхмн, тиим кичәл урднь чигн бәәсмн. Обществознаня кичәлд зуг 9-ч классас экләд багшнр цәәлһвр өгдг болх, тиим сольвр 2025 җиләс авн орулгдх.
«Төрскн келн» болн «Төрскн сойл» гидг көтлврт шин кев-янз орулгдх, түүнә ул деер сурһульчнр сойлан, кезәңк авъясан, келн-улсин цецн ухана зөөриг дасхмн. Тиим кевәр сурһульчнр хальмг келнә болн сойлын туск медрлән байҗулх гисн бат иткл бәәнә.
ТҮРВӘН Һуна

Видео