Цергчнриг дөңнҗәдг көгҗмин наадм

Цергә шишлң керг-үүлдвр эклснәс авн мана орн-нутгин улс түрүн зергләнд әмән әрвллго йовсн салдсмудыг дөңнҗ, ирлцңгү тусан күргәд бәәнә. Буйнч седклтә әмтн, арһлачнр, эгл улс чигн нег һазра цергчнриг керглгдҗәдг тоотар даңгин теткнә. Олна кергин төлә цуһар шунмһаһар орлцҗ йовна.
Зуни сүл өдрлә Элст балһснд «Русское лето.ZаРоссию» нертә көгҗмин наадм болв. Тодлхас, эн керг-үүлдвр ноха сарин 24-д Тула балһснд эклв. Энүг Улсин фронт, «Цугнь Диилврин төлә» саң болн Әрәсән Олна палат бүрдәв.
Элстин Диилврин талвңгин тәәз деер таңһчин бичкдүдин нертә коллективс билг-эрдмән үзүлв. Тер мет нарт-делкән чемпион, БРИКС наадна дииләч, бөк Карун Санҗ цуглрсн улсин төлә зарядк давулв. Самбо бөк бәрлдәнә спортсменмүд болн саадгар халһна таңһчин федерацин элчнр ирлцңгү мастер-класс үзүлв. Терүнәс нань наадмд ирсн күн болһн буйнч седклин дөңгән цуглулҗ, бу-селм бүркдг гөлм өлгв.
Тер өдрин асхар Элстин тәәз деер «ЕЩЕ», «ПослеZавтра» болн «RASA» нертә көгҗмин багмуд билг-эрдмәрн байрлулв. Эн багмудын дуд өдгә цагин баһчуд дунд тааслт олсмн, гиҗ темдглх кергтә. Концертд ирсн улс артистнриг дахад дуулад, бииләд чигн авв. Келхәс, көгҗмин эн багмудын артистнр СВО-д орлцачнриг дөңнхин төлә тедн тал кесг дәкҗ йовад, концертс үзүлсн билә. Тер мет 2014-ч җиләс авн артистнр Донбассин улсиг бас билг-эрдмәрн байрлулҗ, Әрәсән харслтын Министерствин темдгүдәр ачлгдсмн.
«Русское лето.ZаРоссию» көгҗмин наадм Әрәсән тавн округудын балһсдт давулгдҗана. Ноха сарин 31-д Элстд бәәтхә, Курган болн Калининград балһсдт наадм бас болв.
Әрәсәд бәәдг олн келн-улс тогтсн амр биш цагла хоорндан ахнр-дүүнр мет ниитәһәр бәәҗ, олна Диилврин төлә арһ-чидлән агсч, нег-негндән нөкд болад бәәх зөвтәвидн гисн күсл эн төрскнч керг-үүлдврин һол дуудврнь болв. Мана өвкнрин үлгүрәр мел иим кевәр бидн үрдән өскәд, эднд төрскнч сурһмҗ өгх зөвтә болҗанавидн.
Төрскнч наадмин чилгчәр цуглрсн әмтн артистнрлә хамдан «Русское лето.ZаРоссию» керг-үүлдврин частр дуулв. Эн керг-үүлдврин тускар Хальмг Таңһчин Толһач Хаска Бату эврәннь ухан-тоолврарн бас хувалцв.
– Чинртә наадм мана таңһчд давулгдснь темдгтә. Нег һазра мана улс цергә шишлң керг-үүлдврт орлцачнриг дөңнҗ, кергтә тоотынь цуглулҗ даңгин илгәнә. Эндр мана салдсмуд бидн эвин таалд бәәхин төлә әмән әрвллго тенд йовна. Тегәд бидн эврәннь талас цуг халхарнь тедниг дөңнәд, тедн диилвр делдҗ, гертән әмд-менд шулун ирхинь зальврҗ бәәнәвидн, – гиҗ Бату Сергеевич темдглв.
«Русское лето.ZаРоссию» көгҗмин наадм орн-нутгар цаарандан давҗана. Һаха сарин 5-д болн 6-д керг-үүлдвр Кемерово, Хабаровск балһсдт болхмн, һаха сарин 7-д болхла, Чита балһснд бас давулгдхмн.

КАРСАНА Евгения