Шунмһа, седвәртә медәтнрин орлцлһтаһар

05-09-2024, 10:14 | Общество, Таңһчин зәңгс, Зіњг, Эрўл-менд харлһн

Әрәсән Президент Владимир Путин Федеральн хургт кесн Илгәврт ах үйин улсин эрүл-менд батруллһна, ачта амрлһнд һарсн медәтнрин бәәдл-җирһл соньн болҗ, эдн олна керг-үүлдврмүдт орлцхиг урмдуллһна төлә немр келн-улсин төсв батлхин тускар келсн билә. Терүнә медлд медәтнр чик авг-бәрцәр бәәҗ, спортар соньмсхин, билг-эрдмән делгрүлҗ, олн зүсн үүл бәрҗ цаган сергмҗтәһәр давулхин, баһчудла харһҗ дамшлтарн хувалцхин төлә керг-үүлдврмүд күцәгдхмн гиҗ зуралгдҗана.
Целинн района әмтнә социальн теткврин хамцу төвин (КЦСОН) медлд 2023 җилд эврә сән дурар үүлддг медәтнрин «Серебряные волонтеры» клуб секгдв. Терүнд района седвәртә, шунмһа медәтнр орна, эдн олн җилдән төрскн һазриннь делгрлтд тәвцән орулҗ көдлҗ йовсн, отг-әәмгтән күндтә болн тоомсрта улс болна. Эн клубин үүлдвриг төвин көдләч Бамбан Данара һардна.
- Мана төвин улд бүрдәгдсн клубд медәтнрин төлә олн зүсн керг-үүлдврмүд давулгдна. Тиигәд, төвин медицинск эгч Татьяна Веселева ах үйин улс дунд чик авг-бәрцин, олн зүсн гемәс саглуллһна төрмүдәр күүндвр тогтаҗ, эднд эрүл-мендән батруллһна туст сүв-севлг өгнә. Төвин улд реабилитацин техническ эв-арһс цаг-зуур олзллһнд өглһнә әңг бәәнә, тегәд медәтнрт эн туслмҗин туск цәәлһвр бас өгнәвидн. Клубин гешүд энд цуглрад, давулх керг-үүлдврмүдин, харһлтсин зура батлна. Медәтнр сул цаган тустаһар болн сергмҗтәһәр давулҗ, хоорндан үүрлҗ соньн кевәр амрхин төлә олн керг-үүлдвр бүрдәнәвидн. Тиигәд, «Социальн зуульчллһн» гидг көтлврин медлд эдн һанц уласн тал йовсн билә. Н.Пальмовин нертә Келн-улсин музейд одад, хальмг улсин тууҗла, сойлла таньлдна, - гиҗ района төвин һардачин үүл дааҗадг Азда Байрта келнә.
Медәтнрин клубин ханьд Бадмин Стелла, Семена Валентина болн Любовь, Бадан Татьяна, Кумала Любовь, Лиҗин Александра, Дадыка Валентина, Богшурһин Нелли, Любовь Мостовая болн нань чигн улс орна. Эдн дунд Троицкое селәнә сойлын Герин улд үүлддг «Ицл» ветеранмудын хорин орлцачнр бәәнә. Эдн дунд ах гиснь Бадмин Дорҗ болна, эн 92 наста. Дорҗ Мучкаевич хөрн һар җилдән ветеранмудын үүдәгч багд дуулҗана. Селәнә сойлын Герин көдләч Кошмана Светлана эн багин үүлдвриг һардна. Эдн районд болдг байрин керг-үүлдврмүдт орлцна, дәәнә болн күч-көлснә ветеранмудт гертнь золһҗ одад, билг-эрдмән үзүлнә. Района ветеранмудын олна ниицәнә ахлач Башанкан Давид эднлә бат залһлда бәрҗ, күндтә улсин ач-тус темдглҗ, сән өдрмүдлә йөрәҗ, медәтнрт һар хоосн одхш.
Комплексн төвин медлд үүлддг медәтнрин клубин болн ветеранмудын хорин ханьд ордг улс седвәр татад, скандинавск йовлһна ниицә бас бүрдәв. Өрүн болһн эртәр Троицкое селәнә захд тосхгдҗадг амрлһна тавлңд медәтнриг үзҗ болхмн. Өр цәәҗ нарн һархла, эдн хамдан йовһар йовҗ, цогц-махмудан батрулҗ, хамдан амрна. Зәрмнь асхар нааран ирнә. Ю-бис күүндҗ, сүл зәңгәрн хувалцҗ, көл-һаран тинилһәд, эдн цаган тустаһар давулдгнь омг өгнә гиҗ медәтнр темдглнә. Һаха сарин 1-д амрлһна талвңгиг байрин бәәдлд секв.
Шунмһа болн седвәртә медәтнрин негнь Бадмин Стелла болна. Стелла Айтаевна олн җилин туршарт района газетин редакцд көдлҗ йовсмн, энүг ик-бичкн уга сәәнәр меднә. Ачта амрлһнд һарсн медәт гертән хара суухин ормд олна бәәдл-җирһлд шунмһаһар орлцҗ, буйнч седклтә керг-үүлдврмүдт тусан күргҗ йовна. Тиигәд, эн «Серебряные волонтеры» клубин ханьд, ветеранмудын дууна багд орсн деерән цергә керг-үүлдврт орлцҗадг нег һазра улст дөң күрглһнә ниицәнә гешүн болна. Энүнә келсәр, ода Целинн районас зун һар күн шишлң цергә керг-үүлдврт орлцҗана. Эдн цергчнрт дулан хувц, хот-хол цуглулҗ өгүлдг деерән бу-селм бүркдг гөлм өлгнә.
- Алдр Диилврин Өдрин өмн өргнд бидн цуглрад, мана цергчнрин төлә 30 киил боорцг, талдан һуйрин кегдлмүд болһҗ, шикр-балта, цә, шилтә хот-хол белдвидн. Ах үйин улсин клубин гешүд белдсн байрин белгиг района олна палатын ахлачин дарук Семена Николай болн бәәрн баһчуд сән өдрин өмн өргнд күргҗ өгв. Района әмтнә социальн теткврин комплексн төвин һардвр болн көдләчнр мана бәәдл-җирһл соньн болхин төлә олн зүсн керг-үүлдвр бүрдәдг төләднь бидн эднд ик ханлтан өргнәвидн, - гиҗ Стелла Айтаевна келнә.
ДООҖАН Наталья
ЗУРГТ: медәтнр цогц-махмудан батрулҗана

Видео