Энткгин һазрас гелңгүд ирҗәнә

Һаха сарин 16-д Троицкое селәнә хурлд Энткгин һазрас гелңгүд ирҗәнә. «Оргьен Саннгаг Чолинг» гидг нер зүүдг эн хурлд шаҗна халхар һазадын орнас гиичнр ирхмн.
Энткгин һазрас гүн шаҗна номта багш Лхунтрул Дечен Гьюрме Ринпоче толһалҗ ирҗәх делегацин ханьд долан гелң йовна.
Энткгин һазрас ирсн гелңгүд ноха сарин 23 күртл Хальмгт бәәҗ шаҗна олн йосрхл күцәхмн. Друбчо Хаягривад нерәдсн тантрическ ик йосрхл Энткгин гелңгүд кехмн. Тер йосрхлын йовудт тавн хонгтан өрүн эртәс авн асхн ора күртл мөргүл болҗ, ном умшгдҗ, шаҗна үүлдврин зевсгүдин ә һарһгдхмн. Зевсгүдин көгҗм дахҗ Цам йосрхлын тантрическ би үзүлгдхиг әмтн үзҗ зальврхмн. Күүнә җирһлд харһҗах, керг күцәлһнд, ном даслһнд учрдг харш тоотыг ууруллһнд тантрическ эн үүлдвр залгдҗана. Зурһан зүүл әмтн болн цуг әмтә тоот эрүл-менд, амулң-таварн бәәхд туслх шаҗна үүлдврт орлцҗ үзтн.
УШКАНА Сувсн