Шин эмнлһ тосхх

Хальмг Таңһчин залврин барин цергллтин зәңглсәр, шидр Приютное селәнд поликлиник тосхлһна төрәр көдлмшч селвлцән болв. Терүг Хальмг Таңһчин залврин Ахлач Босхмҗин Гилән һардҗ давулв. «Эрүл-менд харлһн» гидг келн-улсин төсвин «Эрүл-менд харлһна түрүн дөң күрглһнә халх делгрүллһн» гидг региональн төсвин халхар Приютна района эмнлһнә медлд эн селәнд шин поликлиник тосхгдх зөвтә.

Шаңһа бооца батлсн «ПСК Калибр» гидг тосхлтын бүрдәц төсвин-һаруһин иткл цаас белдх зөвтә бәәсмн, зуг төсвд сольвр орулх кергтә болсна ашт терүг күцәлһнә цаг-болзг хооран саагдв. Тосхлтын материалмуд болн кергсл үнтәрснә ашт тосхлтын көдлмшин һаруг шинәс тоолх кергтә болсна ашт төсв күцәгдәд уга.
Селвлцәнә ашар Босхмҗин Гилән хулһн сарин 1 күртл төсвин-һаруһин иткл цаасдын туст шаңһа шинҗллһнә зөв авх, поликлиник тосхлһна, инженерн сүлҗән оруллһна төрмүдиг хаһлх неквр тәвв. Үкр сарин 1 күртл тосхлтын көдлмш эклх зөвтә. Шин поликлиник 2025 җилин чилгчәр эдлврт орулгдх зөвтә, тегәд цуг белдврин керг-үүлдврмүдиг шунмһадулх кергтә гиҗ таңһчин залврин Ахлач темдглв.
Селвлцәнд Хальмг Таңһчин залврин Ахлачин дарук–таңһчин социальн делгрлтин, күч-көлснә болн көдлмшәр тетклһнә министр Өлзәтин Марина, таңһчин эрүл-менд харлһна министр Саран Булат, Приютна района муниципальн бүрдәцин толһач Манҗика Басң, таңһчин тосхлтын, көлгн-күчнә болн хаалһин эдл-ахун министерствин, «Бат тосхлтын һоллгч заллт» бүрдәцин элчнр орлцв.

БАТАН Наталья