Көтчнрәхн дәкнәс ончрв

Таңһчин уйн наста зуульчнр Яшалтан һазрт эврә дарани марһанд цуглрв. Одахн Яшалтан района «Лесная сказка» бичкдүдин эрүл-мендинь батруллһна төвин ул деер таңһчин сурһульмудын арвтнрин 46-ч зуульчллһна цуглран секгдв.
Таңһчин эн марһан һаха сарин 11-әс авн 15 күртл болв. Тер мет эн җилин һаха сарин 27-д темдглдг зуульчллһна делкән Өдрт эн марһан нерәдгдҗәнә.
Эн керг-үүлдврт ут турштан 11 района 14 команд орлцҗана. Намрин зуульчллһна цуглран арвтнрт эврә белдврән, эв-дован үзүлх арһ өгчәнә, хамцулын ханьд нег-негән дөңнҗ, эдн дөрлдәнә сән дамшлт хоршаҗана.
Арвтнр болн теднә сурһмҗлачнр талдан райодын элчнрлә харһҗ, теднә әмдрлин тускар кесг тоот медҗ авна, бийиннь тускар чигн келҗ өгнә, билг-эрдмән үзүлнә, тиим кевәр иим марһан тедниг йостаһар хамцулна.
Авъяст тохрсар җил болһн авртнр ик дуртаһар нааран ирнә, энд эдн шин үүрмүдән олна, олн зүсн соньн дөрлдәнд орлцҗ, эн җил байрта-бахтаһар «Лесная сказка» төвд цаган давулв.
Зуульчллһна марһана көтлврин йовудт эдн кесг дөрлдәнд орлцна, чидлән сөрнә, чаңһ-чииргән, сән белдврән үзүлнә.
Олн зүсн саалтгта марһанд орлцҗ, эдн эврә хамцулын болн бийиннь төлә темдгүд хоршана, тиим кевәр тиим дөрлдән ик дааврта болна. Тер мет бүртклһнә- зуульчллһна хаалһ давҗ һарад, үзг-хаалһан түргәр олҗ авлһна спортын марһанд эв-дован үзүлнә.
Давсн җилин ашар хамгин өөдән ашт Көтчнрә района Инҗин Лиҗин нертә Ергенинский селәнә дунд сурһулин команд күрәд ончрв. Тиим кевәр энд хамгин сән белдвртә болн дамшлтта уйн наста зуульчнр цуглрсн билә, гиҗ келхлә буру болшго. Яһад гихлә хойрдгч орм бас эднә баг эзлв.
Һурвдгч ормд Городовиковск балһсна 3-ч тойгта сурһуль болн И. Г. Карпенкон нертә Приютна лицейин ни-негн сурһульчнр һарв.
Эн җилин чинвртә йовудта дөрлдәнд давсн җилин дииләчнр болн призермуд цуг арһ-чидлән сөрҗ, урдк ашан өөдлүлхин төлә дөрлдв. Тиим кевәр Көтчнрә района Ергенинскийин дунд сурһулин элчнр 2024 җилин зуульчнрин марһана дииләчнр шинәс болв. Эдниг бәрсн күцәмҗлә йөрәҗәнәвидн.
Йирдән Көтчнрә районд сурһульчнр болн теднә багшнр зуульчллһнд дурта, эн марһанд районас хойр команд ирв: Ергенинскийин дунд сурһулин болн Көтчнрә гимназин элчнр мөн. Районд тиим командсин то өстхә гиҗ йөрәҗәнәвидн. Бәрсн диилврт ик нилчән нег һазра багш Овкаҗин Дольган күргв.
Цааранднь призермудын тускар келхлә хойрдгч ормд И. Г. Карпенкон нертә Приютна лицейин команд һарв. Давсн җил эдн һурвдгч орм эзлсн болхла, ода улм деегшән һарад хойрдгч ашт күрв.
Һурвдгч күндтә ормд Целинн района шин бүүрән одахн йөрәсн Г.Жуковин нертә Троицкое селәнә дунд сурһулин команд һарв. Цуглрана кесг марһанд эдн сән белдврәрн йилһрв, тер тоод төрскн райоһан, Троицкое селәнә тууҗан сәәнәр меддгән үзүлв.
– Цуг орлцачнр сән үзмҗд күрхәр арһ-чидлән агсв. Марһан ик чинвртә болн соньн болв. Командсин һардачнр-багшнриг онц темдглх кергтә. Тер тоод Яшкуль селәнә 2-ч тойгта сурһулин, Ик Царңга сурһулин, Көтчнрә гимназин уйн наста спортсменмүдиг темдглҗ болхмн. Цугтан эдн белдврән ясрулв, дарук җилд марһана ашнь сольгдад бәәх гиҗ күләҗ болҗана, – гиҗ марһана зарһч Бутан Ирина келв.
Цуг орлцачнриг бидн йөрәҗәнәвидн. Эн цуглрана марһанд авсн сурһмҗан, дамшлтан цааранднь ясрулҗ, дарук җилин слетд улм өөдән күцәмҗд күртн гиҗ дурдҗанавидн.
Цуг призермуд болн диилвр бәрсн командс таңһчин сурһуль-эрдмин болн номин министерствин Күндллһнә һашгудар, дипломсар болн үнтә белгүдәр ачлгдв.
ТҮРВӘН Һуна