Зарһчнр дөрлдв

21-10-2024, 16:25 | Спорт, Таңһчин зәңгс, Зіњг

Яшкулин района ДЮСШ-н медлд «Эцк-эк хойр болн би спортын өрк-бүл»гидг нерәдлһтә керг- үүлдвр болв. Хальмг Таңһчин зарһчнрин хүүв седвәр татсн спортын нәәрт зарһчнрин болн зарһин бүрдәцсин көдләчнрин өрк- бүлмүд орлцв,тиигчкәд эн керг- үүлдвр өрк- бүлин җилин йовудт давулгдснь темдгтә болв.

Хальмг Таңһчин Деед зарһин, Элст балһсна, Сарпан, Баһ-Дөрвдә, Целинн болн Хар Һазра райодын зарһин командс хоорндан дөрлдв. Яшкулин района толһачин негдгч дарук Валерий Колышев, Хальмг Таңһчин зарһчнрин хүүвин ахлачин дарук Саңһҗин Дмитрий, Хальмг Таңһчд үүлддг Зарһин департаментин Заллтын ахлачин дарук Минкән Очр болн Хальмг Таңһчд «Зарһчнрин Әрәсән ниицән» гидг Цугәрәсән олна бүрдәцин региона әңгин гешүн, Хар Һазра района зарһин ахлач Саңһҗин Оксана эн марһаг секч,цугтаһинь йөрәһәд, күцәмҗ дурдв.
Керг-үүлдврин бүрдәһәчнр олн зүсн даалһвр өгәд, хамгин эвтә-довтаһинь, шулун-шудрмгинь, чаңһ-чиирг чидлтә улсинь йилһҗ авв. Марһаст орлцачнрт бичкдүдин «Тууль» нертә үүдәгч коллективин артистнр билг-эрдмән үзүлв.
Тиигәд марһана ашар Баһ-Дөрвдә района зарһчин нөкдин Хойновихнә бүл күндтә негдгч орм эзлв. Хойрдгч болн һурвдгч ормст ирлцәд Целинн района болн Элст балһсна зарһсин элчнр Андреевихн болн Лиджаевихн һарад бас ачлгдв. Марһаст шунмһа кевәр орлцсн Сарпан района зарһд көдлҗәдг Владимир болн Өлзәт Сахоровихнә, Элст балһсна зарһч Гилән болн Сергей Цикировихнә,Хальмг Таңһчин Деед зарһин зарһчин нөкд Надежда болн Эрнцн Мукаевихнә болн Хар Һазра района зарһиг элчлҗәдг Саңһҗ болн Юлия Эрдниевихнә бүлмүдт шишлң дипломс болн үнтә белгүд бәрүлҗ өггдв.
Сул цаган сергмҗтәһәр давулсн зарһчнрин өрк-бүлмүдин гешүд керг-үүлдврин бүрдәһәчнрт зүркни ханлтан өргв.

Шагҗин Любовь
Зургт: Целинн района зарһин элчнр

Видео