Елена Хасикова үүдәсн өдгә цага хувцн

Әрәсән хотл балһснд «Московская неделя моды» гидг өдгә цага хувцна туст һарчах шин тоотд нерәдсн керг-үүлдвр күцәгднә. Эн җил сәәхн эн керг-үүлдвр хулһн сарин 4-әс авн 9 күртл «Манеж» нертә Төв һәәхүлд болв. Әрәсән 41 балһснас 200 дизайнер эврәннь уйҗ белдсн хувцан энд үзүлв. Хальмг Таңһчас модельер Елена Хасикова белдсн хувцн энд үзүлгдв.
Кееһә хувцна долан хонгт талдан һазрас ирсн модельермүд чигн эврә хувцан олна оньгт тусхав. Зааһад келхлә, Китдин, Негдсн Арабск Эмиратмудын, Коста-Рикан, Энткгин болн талдан орн-нутгудын дизайнермүд белдсн хувциг энд үзҗ болхмн билә.
Москван мэрин дарук Наталья Сергунина эн йовдын тускар иигҗ келв: «Эн сәәхн ик хәләврт орлцачнр хувц уйлһна эрдмән үзүлҗ чадв. Өдгә цагт ямаран хувцн тааста болҗахинь үзүлсн деерән иргчдән ямаран хувцн әмтнә оньгт тусхагдхинь үзүлв. Кееһә хувцна туст диззайнермүд хоорндан таньлдҗ, дамшлтарн хувалцв. Урдк долан хонгуд метәр сәәхн эн үүлдвр олн улсиг соньмсулв».
Зурһан хонгин туршарт эн сәәхн үүлдвриг хәләхәр 65 миңһн күн нааран ирсмн. Олн-зүсн хувцна 83 хәләвр бүрдәгдв.
Наталья Сергунинан тоолврар, SHCHUR шин хувцн өдгә цага бәәдлиг сән кевәр үзүлҗәнә. Эннь Елена Хасикова белдсн коллекц болв. Хувцн болһн өвәрц болсн деерән альд болв чигн терүг өмсҗ болхарн әмтнә оньг авлна. Тиим ниицәтә хольврин ашт эврә нерн үүдв. Хар, күрң, күрңтсн улан, шар улан болн элснә өңгтә хувц-хунр шин уйдларн, эвтә шагларарн өңг-зүснә ниилврәрн әмтнә оньг авлад бәәв.
Хамгин һол кегдлмүд – киитн цагла деерән өмсдг хувцн, арсн шалврмуд, атлс эдәс уйгдсн киилгүд өдгә цага хувцна хәләврт ирсн әмтиг соньмсулв. Арсн шалврмуд цагин неквр дахч, соньнар ишкҗ уйгдснь, атлс киилгүд олн-зүсн янзарн болн өңг-зүсәрн соньмсаҗ, терүг альд болв чигн өмсҗ болхарн тааслт олв. Гиигн нисәд бәәдг эд талдан күнд болсн деерән авъяс болсн хату эдлә нәәһинь олҗ олзлсарн чигн «Эгчнр Щур» гидг хувцна ончнь болв. Эннь модельер Елена Хасикова белдсн хувцн болҗана. Хотл балһснд болсн өдгә хувцна ик хәләврт Хальмг Таңһчас эн модельерин коллекц тиим тааслт олв.
Келхәс, күүкд улсин хувциг үүдәҗ һарһдг Елена Хасикова олн дунд темдгтә модельер «Женская одежда сестер Щур» (хәрд һархин өмн Елена Щур бәәсмн) гидг нертәһәр белдсн эднә хувциг әмтн меднә, таасад хулдҗ авна. Эднә хувцн Элстин хойр лавкд болн Уфа балһснд хулдгдна.

ҖИРҺЛИН Кермн