Моңһлас ирсн гиичнрлә харһв

Хальмг Таңһчин Улсин Хуралын (Парламентин) Ахлач Артем Михайлов болн депутат Кокан Михаил Моңһлас ирсн гиичнрлә харһв. Ах-дүүнрин орн-нутгас ирсн делегацин ханьд Алтн Һасна орденәр ачлгдсн, «Тод номын гэрэл» олна ниицәнә һардач Баатаржав Бат Амгалан, Алтн Һасн орденәр ачлгдсн Моңһл орн-нутгин болн Тыва Республикин ачта артист Самандын Җавхлан, Барун Моңһлын тавн әәмгин зуульчллһна багин һардач Җалав Батсух Цэвээн Оюна авальтаһан, «Манай Могол Мандана» олна бүрдәцин менеджер Жамьянжав Тугс-Эрдэнэ орв. Күндтә гиичнр мана таңһчур «Моңһлын үүрмүдин ниицән» олна негдлтин үрврәр ирв.

Артем Михайлов Әрәсән болн Моңһл нутгин хоорнд ик кезәнәс авн батрсн тууҗлгч залһлдана тускар келәд, хойр орн-нутг хоорндк хәрлцәг батруллһнд Хальмг Таңһч онц чинр зүүҗәхиг темдглв. Хальмг Таңһчин Улсин Хуралын (Парламентин) үүлдврин тускар ахрар келҗ өгәд, 2025 җилд мана таңһчд шар шаҗна нарт делкән III хург болхмн гив.
Харһлтд орлцачнр Хальмгт болн Моңһлд сойлын болн зуульчллһна халхар күцәгдсн төсвсин тускар, экономикин халхд бас хамцу төсв күцәхин төрәр күүндв. Җалав Батсухин тоолврар, Хальмг Таңһч Европд моңһл улсин ор һанцхн элч болҗахас иштә зуульчллһ делгрүллхин төлә сән таал бәәнә. Эн Хальмг Таңһчд «Ойрад Тумэн» наадм давуллһна туст сән дамшлт хоршасна тускар келәд, Артем Михайловд Чиңһс хаана зург белглв.