Хаалһин эдл-аху күцәмҗтәһәр делгрҗәнә

Давсн амрлһна өдрмүдт Элстд Әрәсән хаалһин эдл-ахун көдләчнрин Өдрт болн Хальмг Таңһчин хаалһин- көлгнә халх бүрдәгдснә 95 җилин өөнд нерәдгдсн байрин хург болв. Терүнд Хальмг Таңһчин Толһач Хаска Бату, таңһчин залврин Ахлачин үүл дааҗадг Босхмҗин Гилән, хаалһин эдл-ахун көдләчнр болн ветеранмуд орлцв.

Җилин дөрвн цагт хур-чиг болну, һаң халун болну хаалһс тосхдг, ясдг улсин ач-тус хәрүләд, Хальмг Таңһчин Толһач Хаска Бату эн цергллтин делгрлтд ик тәвцән орулсн ветеранмудт болн эндр чигн даавртаһар көдлҗ йовдг көдләчнриг сән Өдрлә йөрәв. «Сүл тавн җилин эргцд мана орн-нутгт «Әәмшг уга болн сән чинртә хаалһс» гидг келн-улсин төсв эклснә ашт мана таңһчд хаалһсин бәәдл ясрв, хаалһс тосхдг бүрдәцсин материальн-техническ ул батрв. Тиигәд, сүл тавн җилд хаалһсин ясврт, тосхлһнд ут тоодан 17 җува арслң һарһгдв. Мана таңһчд тавн миңһн дууна хаалһс бәәнә, эндр бидн көлгн йовдг хаалһсин ясвр кесн деерән тагтс болн нань чигн тоот ясчанавидн», - гиҗ Бату Сергеевич келв. Хаалһин эдл-аху делгрүллһнд Әрәсән залврин Ахлачин дарук Марат Хуснуллин болн РФ-н көлгнә министр Роман Старовойт ик дөңгән күргҗәхиг таңһчин Толһач онц темдглв.
- Мана таңһчин хаалһсар кесг көлгн давҗ һарна, тегәд бидн хаалһсин хаҗуд сән таал тогтах зөвтәвидн. Логистическ төвмүд тогталһна туст зура бәәнә. Мана таңһчин әмтнд болн гиичнрт хаалһсин хаҗуд сән таал тогтаҗ, көлгн-күчнә тосн-түләнә өдгә цага зогсалмуд, олн зүсн гиичлүрмүд, кафе болн нань чигн тоот секх кергтә. Эн төр хаһлх кергтә, тер цагт хаалһст зеткртә йовдлмуд учрдгнь баһрх чигн биз. Мадниг орн-нутгин һардвр дөңнҗәнә, тегәд бидн эн төриг эрк биш хаһлхвидн, - гиҗ таңһчин Толһач йөрәлин үгдән келв.
Байрин хургт хаалһин болн көлгнә эдл-ахун делгрлтин халхд күцәгдҗәдг керг-үүлдврмүдин тускар келгдв. 2019 җиләс авн таңһчин хааһсин бәәдл ясрв. Таңһчин әмтнә болн гиичнрин төлә сән таал тогтахин төлә хаалһс ясгдҗана, шин хаалһс тосхгдҗана, балһсна уульнцст хату девскртә хаалһс кегдҗәнә, өдгә цага техническ бүрдәцс тогтагдҗана. 807 дууна таңһчин хаалһст ясвр кегдв, 12 бәәрн хаалһ тосхгдв, ут тоодан 194 дууна хаалһ тосхгдв. 2022 җилд Хальмг Таңһчин төсвин багин көдлмш күцәмҗтә гиҗ тоолгдад, дипломар ачлгдв. Һурвн җилин эргцд таңһч «Әәмшг уга болн сән чинртә хаалһс» гидг келн-улсин төсвин керг-үүлдврмүд күцәлһнә халхар нүүрлгч регионмудын тоод йовна. Тер мет таңһчд хаалһин җисәнә зокал эвдсн йовдл тодлдг зург болн видео цокч авдг стационарн 105 кергсл углҗ тәвгдв. Олн әмт зөөлһнә төр хаһлхин төлә «ЭлистаГорТранс» бүрдәц бүрдәгдв, терүнә төлә мана орн-нутгт кеҗ һарһгдсн 62 автобус хулдҗ авгдв. 2024 җилд бүрдәц СИМАЗ тамһта 20 автобусар теткгдв.
Хальмг Таңһчин залврин Ахлачин үүл дааҗадг Босхмҗин Гилән йөрәлин үгдән хаалһин эдл-аху таңһчин экономикин делгрлтд ик чинр зүүҗәхиг темдглв. Хаалһин болн көлгнә эдл-ахун халхар үүлддг бүрдәцсин болн арһлачнрин төлә сән таал тогтах, эдн олзта-орутаһар көдлхин төлә шин төсвс кергтә гив. Эн халхд иргчдән көдлх баһчудыг белдлһнд Элстин политехническ колледж ик тәвцән орулҗана, тегәд көдлмшч эрдм дасчах оютнриг дөңнх кергтә гиҗ Гилән Герасимовна темдглв.
Байрин хургт Хальмг Таңһчин хаалһин болн көлгнә эдл-ахун 95 җилин өөнд болн эн халхин сән өдрт нерәдҗ, олн җилдән үнн кевәр көдлҗ йовх улст шаңһа ачлврмуд бәрүлҗ өггдв. Тедн дунд Яшкулин хаалһин 2-ч заллтын көдләчнр Дюгида Борис болн Булыка Юрий Әрәсән көлгнә министрин Ханлтын бичгәр, Марат Абдрахманов болн Җаһруна Борис «Әрәсән хаалһин ачта көдләч» темдгәр ачлгдв. Таңһчин көлгн-күчнә делгрлтд ик тәвцән орулсн «АвтоТехСервис» ООО-н генеральн һардач Павел Симаковд «Хальмг Таңһчин күндтә иргн» болн «Доррис» ООО-н һардач Валерий Шавлаковд «Хальмг Таңһчин улсин эдл-ахун ачта көдләч» нерн зүүлһгдв. Тер мет кесг көдләчин ач-тус Хальмг Таңһчин Толһачин Ханлтын бичгәр, Хальмг Таңһчин залврин Күндллһнә һашгар темдглгдв.

ДАВАН Наталья
ЗУРГТ: Хальмг Таңһчин Толһач Хаска Бату хаалһин болн көлгнә эдл-ахун көдләчнриг йөрәв