Сурһуль-эрдмин нүүрләчнрин тоод орв

Городовиковск балһсна хойр багш «Сурһуль-эрдмин нүүрләчнр» гидг таңһчин марһана дииләчнрин тоод орв.

Хулһн сарин дундурар Элстд «Сурһуль-эрдмин нүүрләчнр» гидг марһана ашнь диглгдлә. Энд райодын 11 элч эврә медрлән, эв-дован, сурһуль-эрдмин салвриг делгрүллһнә болн оңдаруллһна халхар бәәх эврә сүв-селвгәрн сольлцв. Эдн орн-нутгин президентин «Әрәсә күн болһнд күцлдән күрх арһ өгнә» гидг платформин кемҗәнд тиим ик марһанд орлцв.
Дөрлдәнд орлцачнр сурһуль-эрдмин таңһчин системин күцәх кесг төрәр тоолвран келҗ, терүг ясруллһна тускар дамшлтарн хувалцҗ, тер төрәр ахрхн илдклән эс гиҗ соңсхвран кех зөвтә бәәсмн. Тиим кевәр эднд бүрдәцин һардачин дамшлт эрк биш кергтә бәәсмн, тер мет сурһуль-эрдмин болн нань чигн салврин зака медлһиг эдн марһана даалһвр күцәлһнә йовудт үзүлх зөвтә бәәсмн. Тиим кевәр эднд кесг салврин медрл болн дамшлт кергтә бәәсмн.
Түрүләд эдн алс-зәәһин арһар марһана даалһвр күцәҗәлә, дәкәд эднәс хамгин сән белдвртә 11 күүг шүүҗ авв. Дөрлдәнә йовудт эдн олн зүсн даалһвр күцәҗәсмн, тер мет сурһуль-эрдмин бүрдәцин делгрлтин кесг көтлвриг зааҗала. Өдгә цагин нәрн төриг яһҗ хаһлхин тускар эврә хәләцән медлүҗәлә. Тер мет эврә кесг төсв үүдәһәд, түүнә олз-тус юунд бәәнә гиҗ талдан орлцачнрин болн жюрин өмн цәәлһҗ өглә. Болв багш улс дааврта хәләцтә болчкад эрк биш эднд тәвсн күцлд күрхәр седнә, тегәд дөрлдәнә даалһвриг цугтан күцәхәр седҗәлә, түүнә ашт марһана йовуд чигн чинврдәд бәәлә гиҗ келхлә үлү болшго.
Тиигәд аштнь чинвртә йовудын хөөн таңһчин дөрлдәнә дииләчнрин тоод Б.Б.Городовиковин нертә Городовиковск балһсна олн салврта гимназин директорин сурһмҗин селвгч Наталья Владимировна Шевцова, бас Городовиковск балһсна 3-ч тойгта сурһулин орс келнә болн литературин багш Анастасия Владимировна Кривенец, Целинн района «Алтн түлкүр» гидг бичкдүдин садын ах сурһмҗлач Алла Владимировна Тактинова орв.
«Марһанд бәрсн диилвр нанд шин дамшлт өгсн деерән, олн дунд йилһрснә бахмҗ, күцәмҗд күрснә байр белглв. Мана гимназин һардач Виктория Лазировна Лайпановад ик ханлтан өргҗәнәв, эдн мана сурһулин башнрла хамдан намаг цуг дөрлдәнә йовудт дөңнҗ йовла», – гиҗ Наталья Шевцова марһана хөөн үүрмүдтән ханлтан өргв.
Наталья Владимировна урднь бүрдәцин һардач болҗ көдлҗ йовла, тер дамшлтнь дөрлдәнә даалһвр күцәлһнд дөң болҗала. Амр биш сурврт Наталья Владимировна дигтә хәрү өгчәлә. Тиигчкәд Городовиковск гимназин багш таңһчин йилһән сән багш гидг җилин марһанд орлцла, тенд бас күнд сурврт хәрү өглһнә болн нань чигн салврар ик туста дамшлт хоршала. Тиим кевәр олна кесг керг-үүлдврт орлцлһн бас туста болна гиҗ келх кергтә. Марһанд дигтә-даратаһар белдснә ашт чигн тиим өөдән ашт күрч чадв.
«Сурһуль-эрдмин нүүрләчнр» гидг төсв эн салврин иргч һардачнриг хәәҗ олхин төлә зарлгдла, тиим мергҗлтнр багшнр болн нам оютнр дунд баһ биш. Таңһчин марһан теднд дигтә хаалһ зааҗ салврин һардгч үүл даалһнд белдҗ теднд онц көрңд орх арһ өгчәнә. Эдн сурһуль-эрдмин федеральн, таңһчин эс гиҗ муниципальн кадрин көрңд орх зөв авчана.
- Ода таңһчин марһан давв, болв үкр сард Москвад болх Цугәрәсән марһанд бидн белдх зөвтәвидн, тенд дөрлдән улм нәрн даалһврта, чинрвртә болх гиҗ санҗанав. Маднд марһана йовудт сән медрл өгсн таңһчин сурһуль-эрдмин министерствин болн КРИПКРО-н мергҗлтнрт ханлтан өргҗәнәв, – гиҗ Наталья Владимировна тоовларн келв. Әрәсән марһанд сәәнәр белдәд, тенд бас ончта күцәмҗ бәрҗ мана таңһчин нер дуудултха гиҗ Наталья Владимировнад болн талдан дииләчнрт дурдҗанавидн.
ТҮРВӘН Һуна