Уйн наста седкүлчнр

Яшкулин района «Искра» газетин седкүлч Аида Байгазиева байн дамшлтта, нертә седкүлчнрин тоод орна гихлә үнн болх. Һучн җилин эргцд таңһчин барин халхд эн үнн-чик седклтәһәр көдлҗ, нег һазра улс дунд тоомср болн күндллһ олв. Эн җилмүдин эргцд кедү күүнә, районд болн таңһчд учрсн ончта йовдлмудын, селәдин бәәдл-җирһлин тускар эн бичсн болх гиҗ санҗант. Эн җиләс авн Аида Андреевна Яшкулин Е.Хаглышеван нертә олн халхин гимназьд «Уйн наста седкүлч» болн «Уйн наста блогер» гидг әңгд һардҗ, дорас өсч йовх баһ үйд седкүлчин эрдмин тускар медүлҗ, дамшлтарн хувалцҗана.

- Эн җилин эклцәс авн гимназин һардврин (тер цагт Светлана Делеева һардач билә) сурврар би эн әңгин үүлдвр һардҗ, сурһульчнрла көдлҗәнәв. Эн орс келнә багш Цаган Николаевна Хусееван седвәрәр бүрдәгдсмн. Кружокд 5-7 классмудын болн 8-10 классмудын сурһульчнрин хойр баг бәәнә. Ут тоодан дөчн һар сурһульч орна. Күүкд-көвүд седкүлчин эрдмәр соньмсҗ, зәңг яһҗ бичдгиг, әмтнлә харһад күүндсн цагт ямаран сурвр өгхиг медҗ авна. Гимназьд «Ровесник» гидг газет барлгдна, тегәд сурһульчнр терүнд сурһулин бүрдәцин бәәдл-җирһлин туск зәңг барлна. Күүкд бийснь һарцин тойг болһна редакториг шүүҗ авна, наадкснь зәңгчнр болна. Тиигәд эдн нег-негән соляд, редакторин, зәңгчин, зург цокачин болн техническ көдләчин дааврла таньлдҗ, дамшлт хоршана. Келхд, гимназин газет таңһчин сурһулин бүрдәцс дунд болсн марһанд 3-ч орм эзлсн билә. Күүкд-көвүд гиназин тууҗин, эндрк өдр-бүрин, ачта багшнрин тускар бийснь бичәд, шишлң тойг барт белдлә. Дәкәд мана кружокд «Уйн наста блогер» гидг негдлт бәәнә, терүнд ордг бичкдүд районд болсн марһанд 1-ч орм эзлв. Кружокд орлцачнрт эн марһаст дииләчнрин тоод орснь түрүн күцәмҗ болад, ик урмд өгв, – гиҗ Аида Андреевна келнә.
Сурһульчнр Кирилл Цой, Дарья Шурганова, Карина Аздемирова, Айса Бухаева, Наран Лиджиев, Мингиян Эрдни-Гаряев, Марат Султангалиев сурһулин бәәтхә, района газетд түрүн зәңгән болн зурцан барлҗ, дамшлт хоршаҗана. Эдн хамгин түрүнд гимназьд болдг керг-үүлдврмүдин тускар бичнә, Алдр Диилврин, хальмг улсиг цааҗла харһулсна санлын Өдрмүдт аав-ээҗнриннь тодлврмуд барт белднә. Одахн Аида Байгазиева кружокд ордг күүкд-көвүдин төлә «Калмыкия» гидг зәңгллһнә таңһчин агентствд экскурсь бүрдәв (зургт). Бүрдәцин һардач Хоңһр Марилов РИА-н медлд ордг «Хальмг үнн», «Байр», «Байрта», «Теегин герл» гидг һарцсин, Келн-улсин телеүзлин болн сайтын үүлдврин тускар келҗ өгч, эндрк амр биш цагла олнд зәңгллһнә эв-арһс олна бәәдл-җирһлд ямаран чинр зүүҗәхин тускар ухан-тоолврарн хувалцв. Сурһульчнр телеүзлин студьд ямр кевәр соңсхвр белддгиг үзәд, бийснь диктор болҗ зәңг умшҗ үзв. Зәңгллһнә бүрдәциг һардҗадг Хонгор Марилов, телеүзлд көдлҗәдг Наталья Дорджиева болн Гиляна Богаева Яшкулин районас болҗахиг медәд, күүкд-көвүд нег һазра улсар бахмҗ кев. Эн харһлт эднд йир соньн болн туста болв, юңгад гихлә зәрмснь иргчдән седкүлчин эрдм шүүҗ авх шиидвр авв.
Иим харһлтс цааранднь давулх санан бәәнә, гиҗ Аида Андреевна темдглнә. Гимназин һардач Евгений Тарлов болн энүнә дарук Людмила Романенко уйн наста седкүлчнрин әңгин үүлдвриг дөңнҗ, күүкд-көвүдт иргчдән эрдм шүүҗ авхд иим харһлтс эрк биш кергтә гиҗ тоолҗана. Нег үлү сурһулян төгсәҗәх сурһульчнрт эн кружок иргчдән эрдм шүүҗ авхд туслна. Уйн наста зәңгчнр района бүрдәцсин көдләчнрлә болн һардврла харһҗ, теднә үүлдврин тускар соньмсна. Үлгүрнь, района эмнлһнд одсн кемд эдн эмчин эрдм дасхин төлә ямаран белдвр кех кергтә, полицин әңгд болсн харһлтд зөв-йос харлһна көдләч ямаран авг-бәрцтә болх зөвтә гиҗ сурв.
Маңһдур Хальмг барин көдләчнр сән өдр темдглҗәнә. Яшкулин района «Искра» газетин седкүлч Аида Байгазиеваг олн умшачнрнь болн «Уйн наста зәңгчнр» гидг кружокд ордг күүкд-көвүд йөрәҗ, күцәмҗ дурдхнь лавта. 1995 җилд района гаезтин ах редактор Борис Богаевин үрврәр редакцд күч-көлснә хаалһан эклсн мана үр ирх җилд үүдәгч үүлдвриннь 30 җилин өөн темдглхмн. Энүнә үлгүрәр эндрк бичкдүдәс негнь болв чигн седкүлчин эрдм шүүҗ авч, бас нертә күн болад, кесг җил давад, «Аида Андреевна мини түрүн багш билә» гиҗ келх чигн биз.

ДООҖАН Наталья