Мөргүл болдг хора

Запорожск мүҗин Куликовское селәнд бурхн-шаҗнд шүтдг улс ирҗ, мөргүл кеҗәх хора секгдсмн. Әрәсән Федерацин Зертә-зевтә чидлмүдин 36-ч цергин полигона бәәрнд тер хора экләд үүлдсмн.

Мөргүл келһнә хора-дуган секлһнд Хальмгин делегац орлцв. Таңһчин Улсин Хуралын (Парламентин) депутат Мацга Татьяна, Элст балһсна Хургин депутат, СВО-н ветеранмудын Ассоциацин региональн әңгин һардач Чумуда Николай, ЭГС-ин депутат Энән Андрей тер делегацин ханьд әрүн чинртә эн үүлдврт орлцад, энд церглх шаҗна хувргудт Ноһан Дәркин шүтә белглв.
Мөргүлин хора- дуга секлһнд Бурять Республикин залврин ахлачин дарук Иван Альхеев болн 36-ч әәрмин һардвр орлцҗ, йөрәлин үгән келв.
Цергә үүлдвр күцәгдҗәдг һазрт иим хора секлһн шаҗнд шүтдг цергчнрин итклинь болн урмдынь улм батлх гиҗ эн керг-үүлдврт орлцсн улс иткҗәнә. Энд церглҗәдг цергчнр мөргүлин хора секхин туск седвәр һарһсинь Бурятин залвр дөңнсмн. 36-ч әәрмин протоиерей Петр Грищенко эн хора секлһнд Хальмгин делегациг дуудулх селвг орулсмн. Шаҗна эн үүлдәч мана һазра күн болад, тиим седвәр һарһсна төләд таңһчин элчнр терүнд орлцв. Шаҗна үүлдәчин седвәриг Әрәсән Федерацин Хүүвин сенатор Байир Путеев дөңнсмн. Орс шаҗнд шүтдг цергчнр ирҗ, зальврҗах мөргүлин хора урднь бас эн полигонд үүлдҗәсинь темдглв. Цуг цергчнрин неквр күцәлһнд цергә һардвр килмҗән һарһҗана.