«Мини өрк-бүл! Мини Әрәсә!»

Шидр Н.Пальмовин нертә Келн-улсин музейд «Мини өрк-бүл! Мини Әрәсә!» гидг регионмуд хоорндк һәәхүл секгдв. Өрк-бүлин җилд нерәдгдсн һәәхүлд Москва, Санкт-Петербург, Тула балһсдын, Хальмг Таңһчин, Марий Эл болн Донецк Улсин Республикүдин зург цокачнрин 30 һар үүдәвр олна оньгт тусхагдҗана. Һәәхүлиг Әрәсән Президентин медлд Марий Эл Республикин элч Бадм-Хаалһин Ольга болн зург цокач Ванькан Александр Келн-улсин музейин дөңгәр бүрдәв.
Һәәхүл секлһнд нерәдгдсн керг-үүлдврт Хальмг Таңһчин Улсин Хуралын (Парламентин) Ахлач Артем Михайлов, Әрәсән Федерацин Хүүвин элч Борис Хачиров, таңһчин күцәгч йосна, олна бүрдәцсин элчнр орлцв. Эн җил Әрәсән Президентин шиидврәр мана орн-нутгт өрк-бүлин җил болҗахиг Артем Васильевич темдгләд, эн һәәхүлд орлцҗадг регионмудын то икдүлх кергтә гив. «Нааран ирәд, иим сәәхн зургуд үзхләрн, өнр-өсклң өрк-бүлин альбом хәләсн болҗ нанд медгдв. Зург болһн олн келн-улсин өрк-бүлмүдин сойлла, авг-бәрцлә таньлдулҗана», - гиҗ Артем Михайлов келв.
Һәәхүл бар сарин 12 күртл болхмн. Хөөннь эн Москвад «Әрәсән күүкд улсин ниицән» гидг олна бүрдәцин һәәхүлин бәәрнд үзүлгдхмн.

БАТАН Наталья
ЗУРГТ: Хальмг Таңһчин Улсин Хуралын (Парламентин) Ахлач
Артем Михайлов һәәхүлд ирсн кем