Зәрм закадт сольвр орулгдв

Давсн долан хонгин чилгчәр Хальмг Таңһчин Улсин Хуралын (Парламентин) дарани биш сессь болв. Сүүрт Хальмг Таңһчд ах федеральн инспектор Сергей Бойко, таңһчин Улсин Хуралд Хальмг Таңһчин Толһачин элч Манҗин Араш, зөв-йосна болн зарһин, бүртклһнә бүрдәцсин элчнр, таңһчин залврин гешүд орлцв. Таңһчин Улсин Хуралын Ахлач Артем Михайлов сүүриг нүр үгәр секәд, сессьт һурвн төр хәләгдхиг зарлв.
Урднь болсн дарани биш сессьт Теегин Йосна Бичгт сольвр оруллһна туск закана төсв батлсна ашт «Хальмг Таңһчин зәрм закадт сольвр оруллһна туск» төр хәләгдв. Хальмг Таңһчин Толһач таңһчин залврин Ахлачин болн энүнә даруксин үүлд батлх улсин туст ода таңһчин Улсин Хуралын депутатнр зөвән өгх болҗана, тегәд «Хальмг Таңһчин Толһачин туск», «Хальмг Таңһчин залврин туск» болн «Хальмг Таңһчин Улсин Хуралын (Парламентин) туск» закадт чиклвр орулх кергтә болв. Комитетин сүүрт эн төрәр өргн күүндвр болв, тегәд сессьт депутатнр эн закадын төсвиг нег дууһарн дөңнҗ батлв.
Хальмг Таңһчин Улсин Хуралын регламентд сольвр оруллһна туск төр бас эн сессьт хәләгдв. Тиигәд ода дарани сессь кезә, альд болхин туск зар Улсин Хуралын сайтд барлгддг болхмн.
Өцклдүр Элстд дарани биш дәкәд нег сессь болв. Терүнд ямаран төрмүд хәләгдснә тускар дарани тойгт умштн.

БАТАН Наталья