Нүүрләчнрин тоод йовна

Эн җил Хар Һазра района «Черноземельский» нертә тохма хөд өскдг эдл-аху 95 җилин өөнән темдглҗәнә. Бемб өдрлә эн ончта өөнд нерәдсн байр болв. Эдл-ахун һоллгч үүлдврнь мал өсклһн болна. Кесг җилмүдин туршарт эн эдл-аху нүүрләчнрин тоод заагдҗ, ик күцәмҗ бәрҗ йовхинь темдглх кергтә.
1929-ч җилд эн эдл-аху бүрдәгдәд, түрүләд «15-ч тойгта совхоз» гиҗ нерәддг бәәсмн, хөөннь «Улан хөөч», 1934-ч җиләс авн болхла эндр күртл «Черноземельский» гиҗ нерәдгднә.
Шинкн бүрдсн эдл-ахуг тер цагт дааврта болн дамшлтта мергҗлтнр һардҗ йовсмн. Олн җилин туршарт үлгүр-үзмҗ болҗ көдлҗәсн улс дунд Социалистическ Күч-көлснә Баатрмуд И.М.Буриловиг, Е.Ш.Лукшановиг, тер мет А.Л.Суховеевиг, Н.Н.Павленког, И.Е.Елитенког, Г.М.Сарсенгалиевиг, М.К.Утегеновиг, А.К.Зинетовиг зааҗ болхмн.
Өдгә цагт мал өсклһнә өвкнрин кергиг дааврта улс цааранднь күцәҗ йовна. Шаңһа дөң олзлад, фермермүд малын тооһан икдүлҗ, эдл-ахуд көдлдг улсин төлә цуг таал тогтана.
Байрт орлцсн Хальмг Таңһчин селәнә эдл-ахун министрин үүл дааҗадг Гаван Тимур таңһчин Толһачин йөрәлиг олнд соңсхҗ умшв.
– Олн җилин туршарт «Черноземельский» эдл-аху хальмг тохма мал өсклһнә халхар нүүрләчнрин тоод йовхинь цуһар меднә. Сүл арвн җилин эргцд эн эдл-аху Цугәрәсән селәнә эдл-ахун һәәхүлмүдт орлцад, алтн болн цаһан мөңгн медальмүдәр ачлгдла. Эн җилд болхла, «Черноземельский» ОАО ПЗ тохма хөд өсклһнә Әрәсән орн-нутгин нүүрлгч һурвн эдл-ахун тоод орсинь темдглх кергтә. Эндр эдл-ахуг чадмгар һардҗадг Эрднь-Һәрән Романд ханлтан өргҗәнәв, – гиҗ Тимур Сергеевич цуглрсн улсиг йөрәв.
Байрин йовудт эдл-ахун ончрсн көдләчнр Күндллһнә темдгүдәр ачлгдв. Нег һазра артистнр байрин гиичнрт билг-эрдмән үзүлв.
Терүнәс нань ончта өөн темдгллһнә йовудт бөк бәрлдәнә марһан болв. Терүнд Хар Һазра, Көтчнрә, Яшкулин, Яшалтан, Лаганя, Баһ Дөрвдә райодын болн Элст балһсна элчнр орлцв.

КАРСАНА Евгения