Сән гисн өрк-бүлин эдл-аху йилһгдв

Хальмг Таңһчин социальн делгрлтин, күч-көлснә болн көдлмшәр тетклһнә министерств өрк-бүлин җилд нерәдҗ «Сән гисн өрк-бүлин эдл-аху» гидг марһа зарлсн билә. Шидр терүнә аш диглҗ, дииләчнриг йилһв. Марһанд орлцсн 25 өрк-бүл дундас долан өрк-бүл йилһҗ авгдад, ашлгч марһанд орлцх зөв авсмн. Әмтн эврә дууһан өгәд, сән гисн эдл-аху бәрдг өрк-бүлмүдиг шүүҗ авв.
Марһана ашлгч девсңд долан өрк-бүл орлцв, эннь Ик Буурла района Приманыч поселкас Хулхачиевихн, Яшкулин района Молодежный – Пашаевихн, Үстин района Татал – Малзрыковихн, Хар Һазра района Комсомольский Кибашевихн, Городовиковск района Веселое селәдәс Дамбиновихн, Городовиковск болн Элст балһсдас Фроловихн болн Даваевихн мөн. Өрк-бүл болһн эдл-ахудан ямаран мал асрҗадгин, күүкднь эк-эцкдән дөң болҗ ямаран көдлмш күцәдгин, хамдан эдн цаган яһҗ давулдгин туск видео цокч белдв.
Таңһчин әмтн марһанд орлцсн өрк-бүлмүдиг шунмһаһар дөңнҗ, дууһан өгв гиҗ темдглх кергтә. Өрк-бүлмүдин нег һазра улс, үүрмүднь, таньл-үзлнь болн элгн-саднь эдниг сәәнәр дөңнҗ, бүлән үгән бичв. Марһана ашар Пашаевихнә өрк-бүл диилвр бәрв, эдн 100 миңһн арслңга мөрәһәр болн дипломар ачлгдхмн. Элстд бәәдг өнр-өсклң Даваевихнә болн Үстин района Татал селәнд бәәдг Малзрыковихнә олн үртә өрк-бүлмүд 2-ч болн 3-ч ормс эзлв, эдн 50 болн 30 миңһәд арслңга мөрә авхмн.
БАТАН Наталья
ЗУРГТ: диилвр бәрсн Пашаевихнә өрк-бүл