Депутатнр Босхмҗин Гиләнәг дөңнв

21-11-2024, 15:49 | Политика, Таңһчин зәңгс, Зіњг

Шидр Хальмг Таңһчин Улсин Хуралын (Парламентин) дарани биш сессь болв. Терүнд Хальмг Таңһчар үүлддг федеральн инспектор Сергей Бойко, таңһчин Толһачин һардврин һардачин үүл дааҗадг Кирилл Попов, таңһчин Хуралд Хальмг Таңһчин Толһачин элч Манҗин Араш, зөв-йосна, зарһин болн бүртклһнә бүрдәцсин элчнр орлцв. Эн сессьт нег төр хәләгдв, эннь Хальмг Таңһчин Толһач Хаска Батун селвгәр таңһчин залврин Ахлачин үүлд Босхмҗин Гиләнәг батллһна туст зөв өглһн болв.
Об Сүүриг Хальмг Таңһчин Улсин Хуралын (Парламентин) Ахлач Артем Михайлов нүр үгәр секәд, хуралын медлд ордг партьсин фракцс Гилән Герасимовнала онц харһҗ, күүндснә тускар келв. Таңһчин Улсин Хуралд Хальмг Таңһчин Толһачин элч Манҗин Араш Босхмҗин Гиләнән намтрин болн күч-көлснә хаалһин тускар зәңгләд, таңһчин Толһач Хаска Бату орулсн кандидатурт зөв өгхиг депутатнриг сурв.
Дарунь Босхмҗин Гилән сүл җилмүдт таңһчин залврин кеҗ-күцәсн көдлмшин, ямаран келн-улсин төсвс болн шаңһа көтлврмүд күцәгдҗәдгин, экономик батруллһна, әмтнә бәәдл-җирһлин таал ясруллһна туст дәкәд ямаран керг-үүлдврмүд зуралгдҗахин тускар тодрхаһар келҗ өгв. Тиигәд, сүл хойр җилин эргцд энүнә һардврт таңһчин залвр финансин бәәдл чикләд, региона делгрлтин төлә чинртә төсвс күцәв. Ода мана таңһч 13 төсвд орлцҗана, таңһчин социальн-экономическ делгрлтин онц көтлврин медлд кесг керг күцәв, ирх җиләс авн хойрдгч көтлвр бәәдл-җирһлд тохралһн эклхмн. Сүл җилмүдт таңһчин хазна оруһин әңг хойр холванд икдв, 47 дунд сурһульд бат ясвр кегдв, эрүл-менд харлһна халхд кесг төр хаһлгдв, шин кергсл углҗ тәвгдв, селәдт болн балһсдт сән кец-таал тогтагдв, хаалһс ясгдв болн тосхгдв, гиҗ Гилән Герасимовна келв. Селәнә эдл-аху таңһчин экономикин һоллгч халхнь болна, эндр мана таңһчд 336 миңһн бод мал бәәнә, 93 эдл-аху мал бордлһна халхар үүлдҗәнә, терүнд 23 миңһн толһа асргдҗана. Мана таңһчин эдл-ахуст күсдундур сай хөн бәәнә, хөөдин тооһарн бидн ЮФО-д 2-ч болн Әрәсәд 2-ч орм эзлнәвидн. Таңһчин тәрәчнр 2023 җилд 807 миңһн тонн буудя хураҗ авв, эн җил чигн бас байн урһц авв. Тер мет Октябрьск районд тутрһ урһалһн күцәмҗтәһәр делгрҗәнә, эн җил тәрәчнр нег гектарас 57 центнер тутрһ авч, бас элвг урһц хураснь ик күцәмҗ болв. Иргчдән селәнә эдл-ууш эд-бод келһнә көдлмшиг шунмһадулҗ, арһлачнриг дөңнлһнә немр керг-үүлдврмүд күцәгдхмн. Ирх җилд мана таңһчд бурхн-шаҗна нарт-делкән III ик хург болхмн. Цуг зуралсн тоотыг күцәхин төлә арһ-чидлән хамцулҗ, ниитә кевәр көдлхвидн, гиҗ Босхмҗин Гилән темдглв.
Дарунь таңһчин залврин Ахлачин үүлд батлгдх кандидатд фракц болһн хошад сурвр өгх шиидвр авгдв. Тиигәд, «Негсдн Әрәсә», КПРФ болн «Шин улс» партьсин әңгүдин депутатнр селәнә эдл-ахун халхин төлә мергҗлтнриг белдлһнә, гүлгн гемәс хөрлһнә диспансерин шин бәәр тосхлһна, аэропортыг делгрүллһнә болн нань чигн талдан төрәр сурвр өгв. Фракцс цуһар Босхмҗин Гиләниг таңһчин залврин Ахлачин үүлд батлхиг дөңнҗәхән медүләд, дууһан өгв. Хальмг Таңһчин Улсин Хуралын (Парламентин) Ахлач Артем Михайлов Гилән Герасимовнаг йөрәв. Тер өдрин бийднь Хальмг Таңһчин Толһач Хаска Бату Босхмҗин Гиләниг таңһчин залврин Ахлачин үүлд батллһна туск зәрлгт һаран тәвв. Ода таңһчин заканд орулгдсн сольврас иштә таңһчин залврин Ахлачин даруксин үүлд батлгдх улс бас Улсин Хуралын депутатнрин зөв авх зөвтә.
ДАВАН Наталья

Видео