Хальмг Таңһчин әмтнә сә хәәҗ хамцу көдлхвидн

Артем МИХАЙЛОВ,
Хальмг Таңһчин Улсин Хуралын (Парламентин) Ахлач:
- Дарани биш 14-ч сессь болв, терүнд Хальмг Таңһчин Толһачин селвгәр таңһчин залврин Ахлачин үүлд Босхмҗин Гиләниг батлхд зөв өглһнә төр хәләгдв. Гилән Герасимовна эндр залврин күцәсн көдлмшин тускар маднд тодрхаһар келҗ өгәд, өөрхн иргчдән хаһлх төрмүдин зурала хувалцв. Эн дааврта үүлд көдлсн цагин эргцд ямаран аһу ик көдлмш күцәгдсиг бидн үзҗәнәвидн, тегәд зуралсн тоотыг шин залврин командла хамдан эрк биш күцәҗ чадх гиҗ ицҗәнәвидн. Ода Улсин Хуралын депутатнр таңһчин залврин Ахлачин даруксин үүлд батлгдх улст зөв өгх зөвтә. Таңһчин заканд сольвр орулгдсна ашт депутатнр таңһчин залврин Ахлачин болн терүнә даруксиг батллһна туст Хальмг Таңһчин Толһачд зөв өгх зөвтә, тегәд эн үүлд батлгдсн улс яһҗ көдлхнь мана даавр болҗана. Зака үүдәгч болн күцәгч йосна бүрдәцс әмтнә сә хәәҗ хамдан көдлҗ, таңһчин социальн-экономическ делгрлтин көтлврин керг-үүлдврмүд күцәмҗтәһәр күцәгдхин туст арһ-чидлән хамцулҗ даавриг әдл хувалцх зөвтәвидн.


БОСХМҖИН Гилән,
Хальмг Таңһчин залврин Ахлач:
- Урднь таңһчин залврин Ахлачин үүлд талдан эв-арһар батлгддг бәәсн болхла, ода таңһчин Улсин Хуралын (Парламентин) депутатнр зөв өгх зөвтә болҗана. Тегәд эндр өрүнәс авн Хуралын медлд үүлддг партьсин әңгүдлә харһҗ, таңһчин социальн-экономическ делгрлтин туст күцәгдсн көдлмшин болн зуралгдҗах керг-үүлдврмүдин тускар тооцаһан өгч күүндвидн. Депутатнр намаг дөңнәд, таңһчин Толһачд залврин Ахлачин үүлд батлхд зөв өгснь ик дааврта болв. Таңһчин делгрлтин төлә аһу ик көдлмш кегдв, кех-күцәхнь ода чигн дала. Таңһчин әмтнә олз-ору икдүллһнә, җирһлин таал ясруллһна, шин көдлмшч ормс бүрдәлһн, инвестиционн төсвс күцәлһн шин залврин һол зөрүллтс болхмн. Сүл тавн җилин эргцд пандемийин болн зәрм орн-нутгудын талас хаслһна диг-даран батлгдсн бийнь бидн оруһан хойр холванд икдүлҗ чадвидн. Эннь депутатнр таңһчин залврин седвәрәр орулгдсн закадын төсвсиг дөңнҗ, арһлачнриг дөңнлһнә, алвна мөңгиг амр эв-арһар өглһнә төрмүд хаһлхд туслв. Бидн цааранднь чигн депутатнрла нөкцҗ хамдан үүлдхвидн. Ирх җилд таңһчин социальн-экономическ делгрлтин хойрдгч көтлвр күцәлһн эклхмн, тегәд зуг хамдан уралан зөрх кергтә. Депутатнр намаг дөңнснд ик ханлтан өргҗәнәв. Хальмг Таңһчин Толһач эн үүлд батлхин туст депутатнрас зөв авснь ик дааврта болв, тегәд төрскн һазриннь социальн-экономическ делгрлтин төлә цугинь кехәр шунҗ көдлхвидн.

ДАВАН Наталья