Көгҗмин билгән нерәдв

Хальмг Таңһчин улсин артист Александр Бадма-Горяевин үүдәгч асхн үкр сарин 25-д болв. Дөчн һар җилин туршарт Александр Сергеевич Бадма-Горяев «Бамб цецг» ансамбльд көдлҗәнә, көгҗмин үүлдвриг эн күцәҗ йовна.

Ансамблин дууч болһна дуунд ирлцәтә көгҗминь дахулҗ, Александр һардҗадг оркестр күцәнә. Коллективин биичнр белдҗ тәвдг би болһнд көгҗмин нәәрүлинь Александр Сергеевич билгтә кевәр бас күцәнә.
Нер туурсн коллективин ду-би болһнд Александр Бадма-Горяевин залҗадг оркестр зөвтә тәвцән орулна. Ансамблин эндрк бәәдл – эннь көгҗмин оркестрин ик күцәмҗ болҗана. Энүнә нәәрүлҗ белдсн көгҗмин дөңгәр ансамблин хамгин соньн ду-би үүдсмн. Цуг тернь ансамблин үүлдврин алтн көрң тогтаҗана.
Үүдәгч асхн наадһасин «Җаңһр» театрт болв. Нертә дуучнр Кутлан Мукубенов, Диана Босхомджиева, Мергн Ким, Анна Очкаева, Айса Брюгидикова терүнд орлцҗ, Александр Сергеевичин байринь хувалцҗ, олн хәләһәчнрт билгән нерәдв.
Халх белдснь
ҖИРҺЛИН Кермн