Седкүлчнрлә харһв

Таңһчин Улсин Хуралын (Парламентин) депутатнр олн-әмтнлә даңгин харһад, соньмсулҗадг сурврмудт хәрү өгәд,
кен-негнднь тусан күргхәр шунна.
Одахн мана газетин редакцд Улсин Хуралын депутат Гаджи Фероянла харһлт болв. Гаджи Ростамович седкүлчнрлә өөрхн таньлдад, хамгин түрүнд бийиннь тускар келҗ өгв.
Урднь Советин Союзин ханьд ордг Армения Республикин Аргаванд селәнд эн өсч-босв. Удл уга эк-эцктәһән Иваново балһснд нүүҗ ирәд, дунд сурһулян төгсәһәд, тосхлһна ик сурһульд сурад, хаалһсин инженерин эрдмч болв. 2004 җилд күч-көлснә хаалһан эн эклсмн. Тер цагас авн көдлмшнь хаалһс тосхлһна бүрдәцслә батар залһлдата болв. Тавн җил хооран Гаджи Фероян өрк-бүлтәһән Москва балһснур нүүҗ ирәд эндр күртл тенд бәәнә. Келхәс, Гаджи Ростамович олн үртә эцк болна, авальтаһан хамдан эдн дөрвн үрән өскчәнә.
Өдгә цагт Гаджи Фероян һардҗадг бүрдәц «Әәмшг уга болн сән чинртә хаалһс» нертә шаңһа төсвин йовудт орн-нутгин регионмудт хаалһс ясч тосхчана. Нег үлү мана таңһчд кесг дууна хаалһс эдн бас ясад эдлврт орулв. Эндр Гаджи Ростамович таңһчин Улсин Хуралд «Шин улс» партиг элчлҗәнә. Энүнә келсәр, эн мана таңһчд учрҗадг нәрн төрмүд хаһллһнд шунлттаһар орлцҗана.
«Хальмг үнн» газетин ах редактор Бембин Евгений күндтә гиичд редакцин бәәдл-җирһлин тускар тодрхаһар келҗ өгв. Харһлт үр-иньглгч таалд давв, Гаджи Ростамович газетин редакцд үнтә белгән нерәдснь бас бахмҗта болв.
Карсана Евгения