Алвна өрән бүклднь даңцав

Җил болһн бар сарин 1 күртл мана иргнмүд олн зүсн алван шаңһд даңцах зөвтә болна. Эннь хамгин түрүнд өлг-эдин алвн болдгнь лавта. Зуг заагдсн цаг- болзгт өрән эс даңцасн улсин туст цааҗин керг бүтәгддгиг цугтан меднә биший.
Эдн тер дарунь өрән даңцах бәәтхә терүнәсн давад, нам зөв- йосна бүрдәцин көдләчнрәс бултад,кесгтән бәргддго болна. Эн саамд зарһин приставмудын көдлмшнь немгднә,эврә үрдтән теҗәлин мөңг өгдго, согтуһар көлгән залҗ йовсн, аля- азд,хулха- була йовдлмуд учраһад,мек- тах һарһад,кен- негинь мекләд болн нань чигн халхар зака эвдсн иргнмүд ялд унсна хөөн шаңһд өрән даңцахан төрүц мартддг бәәдлтә... Эдн зөрц тиигдв яһдв,өрән өгчкәд,намхндан бәәхин ормд иим улс бултад,худл келәд,альд көдлҗәхән нууһад,илдр-билдр цокад ичрән геенә эсий?..
Одахн 1-ч тойгта зарһин приставмудын Элст балһсна әңгин зарһин приставмуд 800 миңһн(!) һар арслң өртә бәәсн бәәрн күүкд күүнәс өринь некч авв. Н.иргн закаг эрк биш күцәх кергтәһинь зөрц мартв яһв. Тегәд күчәр күцәлһнә бүрдәцин көдләчнр өртә күүнә тооцана тойгудынь,гер-бүүринь,энүнә медлд бәәсн һазрин әңгинь бәрәнд авад,өлг- эдинь тоод авлһиг зогсахин туст ирлцңгү тогтавр батлҗ авсн болв.
Хәрнь,зуг деер келгдсн керг-үүлдврмүд күцәгднә дару өртә күүкд күн тер дарунь гилтә цуг өрән бүклднь даңцаҗ. Тегәд энүнә туст бүтәгдсн керг чигн бас күцәгдсн болҗ тоолгдв. Манахс басл акад улс,өртә күн өөдән һардго,гиҗ хальмгуд келдгәр, яһдг-кегдг болв чигн өрән эрк биш даңцах цаг ирхинь эдн яһад оньгасн алддг болхви?..

Шагҗин Любовь