Тууврин цагин тускар

Хальмг улсин тууҗд Сиврүр күчәр туугдснь һашута цаг болҗана. Бүкл арвн һурвн җилд хальмг әмтн йосн бишәр гемщәгдҗ, тууврин генәртә цагиг тесч һарсн болдг. Н. Пальмовин нертә Келн-улсин музей тер тууврин цагт нерәдсн керг-үүлдврмүдән эклв.
Музейин көдләчнр «Цагиг мартулдго санл» гидг дамҗҗ йовдг һәәхүл белдсмн. Тер һәәхүлд Элст балһсна 23-ч тойгта дунд сурһулин 5-7 классмудын сурһульчнр ирв. Музейин көдләчнр күүкд-көвүдт тер цагин тускар келҗ өгв. Сиврин тууврин цагин туск лекциг дахулҗ, сурһульчнрт Ирина Долгина белдсн «Память сильнее времени» гидг документальн фильм үзүлгдв. Тууврин цагиг тодлулсн материалмудыг сурһульчнр оньган өгч хәләв.
Музейин дамҗҗ йовдг эн һәәхүл балһсна сурһулин нань чигн бүрдәцст күрхмн. Сара хонгин туршарт тууврин цагин туск лекц соңсч, документальн кино хәләҗ, олн сурһульчнр аавнр-ээҗнрнь ямаран күнд шүүврлә харһсинь медҗ авхмн. Хальмгудын тууҗин һащута эн цаг мартгдх зөв уга.
ҖИРҺЛИН Кермн