«Нүүдлч» ансамблин концертд

Одахн мана хотл Элстд болсн нег концертд урднь соңсгдад уга баахн биичнрин ансамблин биилсн кесг би үзәд, йосндан бахтх саам учрв. Альдас эн биичнр болхв, кен эдниг дасхч йовдг болхв, гиҗ алң боллав. Тегәд шидр «Нүүдлч» нертә бииһин эн шин ансамблин тускар соңсад,мана умшачнрт чигн энүнә тускар медүлх седкл үүдснь тер.

Ик кезәнәс авн хальмг бииһәр дамҗад, келн-улсин авъясмуд хадһлгдҗ йовсмн,юңгад гихлә минь эн би үзҗ, кен-негнь хальмгудын заң-авцинь сәәнәр меддг бәәсмн. Тегәд олн-әмтнә нег чигн темдгтә йовдл хальмг би угаһар давдго бәәснь лавта. Зуг шинҗләд бәәхнь, эндрк мана баһчудын зәрмнь эврә келн-улсин сойлан күцц кевәр меддго болҗахнь һундлта юмн,яһад тиим тоолвр үүдв гихлә,минь иим улс хальмг би биилҗ чаддго болна. Тегәд эн тоотыг учртан авад, келн-улсин сойлыг, заңшалыг хадһлхин төлә социальн технологин Әрәсән шаңһа ик сурһулин (КФ РГУ СоцТех) Хальмгин әңгин һардврин шиидврәр 2023 җилин хулһн сард «Нүүдлч» гидг нертә бииһин оютнрин ансамбль бүрдснь темдгтә йовдл болв гих кергтә. Олн җилмүдин эргцд дууна болн бииһин «Бамб цецг» Хальмгин шаңһа ансамбльд кеермҗ болҗ биилҗ йовсн Хальмг Таңһчин ачта артист Болдра Николай эн ансамблиг һардҗ, баһчудт хальмг би экләд дасхв. Ода энүнд орлцачнрин үгәр,хальмг би дасад, экләд биилҗәхнь эднд омг үүдәҗ, цааранднь эврә билгән делгрүлхд туслҗах болна. Сурһулин бүрдәцин оютнр седклән өгч шин кергт орлцв, ансамбль бүрдәд, цөн цаг давсн бийнь баахн биичнр үүдәгч кесг марһаст орлцад, нүүрлгч ормс эзлҗәхнь ик байр-бахмҗ үүдәҗәнә.
Тиигәд, эн җилин хөн сард «Нүүдлч» ансамбль сурһуль-эрдмин бүрдәцсин дунд давулгдсн «Алдр Диилвр» нерәдлһтә таңһчин үүдәгч негдгч наадмд орлцад, хойрдгч девсңгин лауреатын нер зүүсн болдг. Эн керг-үүлдвр дорас өсч йовдг үйнр дунд төрскнч седкл сурһмҗлҗ, эднә билг-эрдм делгрүлх күслтәһәр бүрдәгдсн бәәҗ. Энүнәс нань эн җилин хулһн сард Элстд болсн ик нәр- наадна йовудт «КТК-билгтә күүкдт 2024» нертә бичкдүдин болн арвтнрин үүдәлтин келн-әмтни хоорндк марһана региона девсңгин аш диглгдсн кемд СоцТех-ин РГУ-н Хальмгин әңгин бииһин оютнрин «Нүүдлч» ансамбль һурвдгч девсңгин лауреат болв. Ансамбльд биилҗәдг Альмина Никитина болхла, этническ би бииләд, күндтә хойрдгч орм эзлснь сурһуль- эрдмин бүрдәцин нер һарһсн деерән хамдан сурчадг үүрмүдинь чигн икәр байрлулв.
Давсн сард энд «Хальмг би- авъясмудын хадһлач» гисн социальн төсвин күцәлһнә йовудт «Нүүдлч» бииһин ансамблин келн-улсин бүшмүдиг олнд үзүллһнә керг-үүлдвр давв. Ирлцңгү ик сурһулин Хальмгин әңгин һардач, экономическ номин доктор Эрднь Пашнанов йөрәлин үг келҗ,эн байрин керг секхләрн, ямр чигн келн- улс эврә заңшалан делгрүлҗ, келн-улсин сойлан, төрскн келән, авъясмудан әрүнәр хадһлҗ, орн-нутгиг, таңһчиг батрулсн деерән мана олна иргч сән-сәәхн болхин төлә зүткҗәхинь онц темдглв. Күндтә гиич болад, эн керг үүлдврт орлцсн Хальмг Таңһчин Толһачин һардврин зәңгллһнә политикин төрмүдәр үүлддг Заллтын әңгин һардач Алексей Харин хальмг улсин сойлын зөөр хадһллһна болн тархалһна халхар чинртә көдлмш кеҗәдг сурһуль-эрдмин бүрдәцин багшнрт ханлтан өргв. Хальмг Таңһчин һарин эрдмин олна ниицәг һардҗадг Четрә Зинаида болхла, хальмгудын авъясмудын болн сойлын һоллгч нег әңгнь болсн келн-улсин бүшмүдиг яһҗ ишкәд уйдгин тускар тодрхаһар цәәлһҗ өгв. Керг-үүлдврин чилгчәр ансамбльд орлцачнр хальмг кесг би биилҗ, сергмҗ үүдәв.
Дәкәд чигн бииһин эн ансамбль «ЛУКОЙЛ» ПАО-н социальн болн сойлын төсвин ХХI марһана ашар «Хальмг би-авъясмудын хадһлач» гидг социальн төсвсин дииләчнрин тоод заагдв. Эн мөрән мөңгәр биичнрин төлә залу болн күүкд улсин һосн хулдҗ авгдв.Мана таңһчд ирлцңгү марһас бүрдәҗ давулҗадг Николай Ляшкон чирәд сурһуль-эрдмин бүрдәц«ЛУКОЙЛ» ПАО-н һардврт ик ханлтан өргҗ, цааранднь чигн нөкцҗ көдлх седклән медүлв.
Даңгин седвәртәһәр, үүдәгч кевәр көдлдг Эрднь Лиджиевичин дөң-нөкдәр сурһуль-эрдмин бүрдәцд оютнрин орлцлһтаһар «Нүүдл» бииһин ансамбль бүрдәгдсиг өөдәнәр үнлх кергтә гиҗ сангдна. Бийнь оньдин өмәрән зүткҗ йовдг эн һардач хамдан көдлҗәдг үүрмүдтән чигн урмд өгч,үлгүр- үзмҗтәһәр үүлддг багшнрин төлә сән кец-таал тогтаҗахнь басл сән нег йовдл мөн. Бидн хальмг улсин бииһин келн-улсин уңг-авцинь хадһлсн деерән энүг иргч үйнрт күргҗ медүлх зөвтәвидн, гиҗ Эрднь Пашнанов мел төвәр келснь чигн орта болҗану эсий…

Шагҗин Любовь
Зургт: «Нүүдлч» ансамблин биичнр күндтә гиичнрлә хамдан Сурһуль-эрдмин бүрдәцин архивәс авсн зург