Әрәсән келн-улсин баатр йовдл үлгүр болна

05-12-2024, 17:19 | Зіњг, Сурєуль-эрдм

Үкр сарин 29-30-д Элстд «Әрәсән келн-улс Төрскән яһҗ харссна тускар» гидг Цугәрәсән номин хург болв. Энүг РАН-а Хальмг номин төв болн Әрәсән цергә-тууҗин ниицән бүрдәв. Түрүн өдр болсн сүүриг номин төвин һардач Куукан Виктория һардҗ давулв.
Эндр орн-нутгт Әрәсән цергә тууҗин кесг төриг үнн-чик кевәр үзүллһн болн цуг хәләциг багтаҗ үнллһн ик чинр зүүҗәнә. Теднәс хамгин хурц төрәр хургт күүндвр болв, цергә тууҗин шин бәрмт цаасиг номин шинҗллтд орулв, тер мет Әрәсән күчиг кесг зун җилин туршарт харсчасн кесг келн-улсин тәвцин туск санлыг хадһллһна болн мөңкрүллһнә тускар бас тодрха күүндвр болсинь темдглхмн.
Цергә тууҗин болн Әрәсәг харслһна кесг дәәнд олн келн-улс орлцлһна төр номтнрин болн шинҗләчнрин тоолврар түшг кеҗ хәләгдв. Әрәсән тууҗиг оңдарулхар седдг деед үзгин элчнрин тоолвриг бурушаҗ, үнн-чик тоотыг олзлх кергтә, гиҗ номтнр тоолвран келв.
«Онц үлгүр зааҗ, бидн Әрәсән кесг келн-улсин болн ах-дү орн-нутгудын хоорндк залһлдаг, теднә хамцлтыг, хортна күчиг күүчх негдсн седклинь нег үлү дәәнә күнд-күчр цагла үзүлх зөвтәвидн»,- гиҗ номт, Әрәсән гегән-герлин министерствин департаментин һардачин дарук Владимир Кикнадзе келв.
Мана өвкнр- өөрд улсин тууҗин, теднә зер-зевин тускар соньн илдклиг Новосибирск балһсна шаңһа ик сурһулин профессор, тууҗин номин доктор Леонид Бобров кеснь соньн болв. Номт өөрд, хальмг дәәчнрин зөргтә үүлдврин, Әрәсән эрк-күчиг харсхин төлә 17-ч- 19-ч зун җилин эклцәр һарһсн туурмҗта кесг баатр йовдлын тускар эврәннь шинҗллтдән медүлҗәнә.
Тер мет Оренбургин багшин ик сурһулин профессор, тууҗин номин доктор Степан Джунджузов Сарпулин, Оренбургин хальмгудын тууҗин тускар тодрха шинҗллт кеҗәнә. Хальмг тууҗд нерәдҗ шинҗллтин ик көдлмш күцәснднь Леонид Бобров болн Степан Джунджузов Хальмг Таңһчин Күндллһнә һашгар ачлгдв. Эднә үүлдвриг бидн өөдәнәр үнлҗәнәвидн, эднә шинҗллт хальмг тууҗин төлә ик чинр зүүҗәнә, эн салврар талдан регионмудын номтнрин көдлмш икдәд йовхла, Әрәсән тууҗ чигн улм тодрхаһар медүлгдх, гиҗ таңһчин Толһач Хаска Бату темдглв.
Хальмг Таңһчин кесг зун җилин тууҗ Әрәсән тууҗла батар залһлдата, орн-нутгин тууҗин нег әңгнь болҗана. Хальмг номтнр эврә тууҗан шинҗлсн кемд Әрәсән тууҗин делгрлтд чигн ик тәвцән орулҗана. Тер ик көдлмшин төлә мана таңһчин кесг номтнр Әрәсән цергә-тууҗин ниицәнә Ханлтын Һашгар ачлгдла, тер тоод Куукан Виктория, Зурһадан Бакур, Болдра Олег болн нань чигн номтнр ачлгдв. Тууҗин, нег үлү Төрскән харсгч Алдр дәәнә тууҗин туск үнн-чик хәләциг Әрәсәд харсчана, худл тоотыг номтнр нег мөслгч кевәр бурушаҗана, гисн хургин һол учр-утхнь тиим болҗана.
Элстд болсн ик чинртә хургт Әрәсән 40 һар регионас тууҗчнр ирв, тернь хальмг номтнрин ик тәвцинь онц йилһҗ, теднә ач-тусинь медүлҗәнә. Хальмг болн өөрд улс кезә чигн Әрәсән күчиг харсч кесг дәәнд залу-зөргәрн йилһрҗ йовсмн, тер тоотыг номтнр Элстд болсн хургт бас нег йилһҗ ончрулсмн.
- Тууҗин номин кандидат Татьяна Людовская Донбасст СВО-н баатрмудын туск санлыг мөңкрүллһнә туск соньн илдклиг кев. Тер мет Украинд Төрскән харсгч Алдр дәәнә туск тууҗиг оңдаруллһна эс гиҗ тер дәәнә туск санлыг ууруллһна төлә ямаран өргн үүлдвр күцәгдҗәхин тускар Донецк шаңһа ик сурһулин номт Оксана Пенькова эврә шинҗллтдән келҗ өгв.
Цуг тер тоот мана сурһульчнриг болн оютнриг, багшнриг икәр соньмсулҗана. Әрәсән болн Хальмг Таңһчин туск соньн лекциг хургт орлцачнр дегтрин саңгудт, сурһульмудт умшв, тернь тууҗар соньмсуллһиг улм икдүлв. Тиим кевәр хургт номтнр болн шинҗләчнр Төрскән харсгч Алдр дәәнә тускар үнн-чик хәләц олнд цәәлһҗ өгсн деерән, баһчудын тууҗар соньмслһиг урмдулв, - гиҗ РАН-а Хальмг номин төвин һардачин дарук Баяна Александра ашлвр кев.

ТҮРВӘН Һуна

Видео