Өрк-бүлин сурһмҗин чинринь өөдлүлҗ

Одахн Москвад сурһульд орад уга бичкдүдлә көдлдг улсин Цугәрәсән VIII чуулһн болв, энүнд орн-нутгин 89 региона элчнр орлцв. Хальмг Таңһчин сурһуль-эрдмин министерствин әңгин ах мергҗлт Лиҗин Кермн, тер мет ирлцңгү әңгин һардач Басңга Светлана болн Элстин 24-ч тойгта садын һардач Һәрән Светлана эн ик хургин көдлмшт орлцв.
- Дошкольн сурһмҗин чинрнь цаг ирвәс өсәд йовна, яһад гихлә ода шин эв-арһин, йосн биш ухана, тооһин эв-арһин цаг ирҗ йовна. Бичкдүд ода тасрхан угаһар мобильн телефонмуд болн планшетмүд нам компьютерин наадд олзлна. Тегәд ода сурһмҗин эв-арһ чигн оңдарулгдх зөвтә. Цуг тер төрмүдиг Москвад болсн чуулһнд хәләв, – гиҗ Лиҗин Кермн келв.
Энүнә темдглсәр, чуулһнд орлцачнр дамшлтарн хувалцҗ, шин эв-арһин тускар күүндв, тоолврарн хувалцв.
Эн ик хург Москван багшнрин шаңһа ик сурһулин ул деер болв. Вузин болн талдан регионмудын мергҗлтнр мастер-классмуд үзүлҗ, лекцс умшв.
Сурһмҗлачнр ниигмәнә сүлҗәнә эв-арһар дамҗад чигн чуулһна көдлмшт орлцв. Әрәсән гегән-герлин министр Сергей Кравцов эдниг йөрәҗ, орн-нутгин бичкдүдин садмудын делгрлтин һоллгч зөрүллтсин тускар келҗ өгв. Бичкн күн болһна билг-дасмгинь илдкҗ, терүг цааранднь делгрүлх кергтә, гиҗ министр темдглв.
Тер мет чуулһна йовудт кесг талвңгуд көдлв. Тер тоод эк-эцкнрлә нөкцлтлһнә, теднд өрк-бүлин сурһмҗин туск медрл өглһнә, теднлә селвгәрн хувалцлһна һол төрмүд хәләгдв. Тер тоод өрк-бүлин авъясиг, үнтә тоотыг дөңндг бәәдл-таал тогталһн ик чинр зүүҗәнә гиҗ вузмудын багшнр болн мергҗлтнр темдглв.
Тер мет мана таңһчд хальмг өрк-бүлин авъясиг, хальмг олн улсин сойлын зөөриг олзллһн, төрскн келән болн тууҗан даслһн, түүнә ул деер төрскнч сән сурһмҗ өглһн ик чинр зүүҗәнә гиҗ мана таңһчин делегацин гешүд темдглв, тер дамшлтыг эдн таңһчд өргҗүлх саната бәәнә.
Тиим нөкцлтин таалд эк-эцкнр болн садмудын көдләчнр бичкдүдиг өсклһнә болн теднд сурһмҗ өглһнә дааврта керг күцәҗәдг өөрхн улс болҗана. Хальмг делегацин элчнр бас тер тоотыг темдглҗ, эн төрәр таңһчин бүрдәцст өргн үүлдвр күцәгдхинь заав.
Эк-эцкнриг бичкдүдин садмудын җирһлд орлцулҗ, тедниг сурһуль-эрдмин шин көтлврлә таньлдулҗ, өрк-бүл болһнд цуг халхин килмҗ өглһнә эв-арһиг өргнәр олзлх кергтә. Тиим көтлврәр хальмг садмудын нүүрлгч сурһмҗлачнр болн багшнр көдлҗәнә, тегәд чигн эдн Цугәрәсән марһасин дииләчнр болна. Ода тер дамшлтыг улм өргнәр олзлх цаг ирв, гиҗ чуулһнд орлцсн таңһчин мергҗлтнр темдглв.
Шалтгта бичкдүдиг чигн өскчәдг өрк-бүлмүд баһ биш, теднлә онц нөкцлт бүрдәх кергтә, тиим таалд һардг саалтг-боомтгиг ууруллһна өдгә цагин дамшлтыг улм өргнәр олзлх кергтә. Мана таңһчд бас тиим үлгүр баһ биш бәәнә, зуг тер дамшлтыг цааранднь өргҗүләд бәәхмн. Чуулһнд өдгә цагин тооһин эв-арһ чигн үзүлгдв, теднә дөңгәр шин сурһуль-эрдмин көтлвр үүдәҗ, көдлмшән улм тустаһар зуралҗ болҗана.
Әрәсәд олн җилин туршарт тогтсн үнтә тоотын болн сойлын нууцин аһу ик чинринь мартлго терүг олзлх кергтә, сойлын болн тууҗин зөөриг шинҗлҗ, төрскнч сурһмҗ өглһнә эв-арһиг өргҗүлхмн, гиҗ чуулһнд нәрн төр тәвгдв.
ТҮРВӘН Һуна