Һазадын орн-нутгудла нөкцлтән делгрүлҗәнә

Әрәсән регионмудла болн талдан орн-нутгудла таңһчин хәрлцә өргҗүллһнд таңһчин Толһач Хаска Бату эврәннь үүлдвртән ик оньган өгчәнә. Одахн Бату Сергеевич Союз Мьянма Республикд көдлмшин халхар одад ирв. Эн орн-нутгин һардврла болн энүнә регионмудын элчнрлә нөкцлт делгрүллһнә тускар күүндвр кев.

«Азийин орн-нутгудла хәрлцәһән өргҗүлхин кергт Әрәсән төлә Мьянма ик чинр зүүнә. Түүнә седвәринь Әрәсә цуг халхар дөңнҗ, кергтә дөң-тусан күргхдән белн бәәнә. Тер мет Хальмг Таңһч хамцу үүлдврән делгрүлҗ, түрүн девсңд сойлын болн шаҗна халхар залһлдаһан өргҗүлх. Янгон региона министрлә тер төрәр күүндвр келәв. Элстд ирх җилд болх нарт-делкән шар шаҗна III ик хургт орлцтн гиҗ һазадын орна үүрмүдт үрвр келәв. Мьянма орн-нутгин залврин ахлач Мин Аун Хлайн ик хургт хәләгдх төрмүдәр соньмсв. Бурхн Багшин ном шинҗлҗ терүг тархах күсл тәвгдҗәнә. Терүнә ул деер талдан чигн төрәр күүндвр кеҗ болҗана», – гиҗ Бату Сергеевич тоолвран келв.
Ик хургин тускар мана орн-нутгт болн талдан орн-нутгудт медтхә, баһчуд, баһ наста номтнр тер кергт олар орлцтха, гиҗ одахн Элстд Хальмг ик сурһулин һардвр нарт-делкән баһчудын ик керг-үүлдвр бүрдәлә. «Регионмуд болн сойлын хоорндк шинҗллтиг бидн делгрүлхәр седҗәнәвидн. Ирх җилд болх III ик хургин йовудт баһ наста номтнрин әңг үүлдхмн гисн селвг орулгдв. Тер мет баһчудын цаг-зуурин номин коллективс тогтаҗ, ул-сүүрин болн дамшлтын шинҗллтән цааранднь күцәхәр зуралҗанавидн, – гиҗ Хальмг ик сурһулин һардач Салан Бадм тоолвран келв.
Тер мет Башкирин хотл Уфа балһсна РАН-а номин төвин тууҗин күрәлңгин номт Ильнур Буляков бас цаг-зуурин коллективст хамцу шинҗллт келһнә седвәриг дөңнв. Исламин шаҗн теднә һазрт ямр делгрлт авсна тускар улм тодрха шинҗллт кеҗ болҗана, гиҗ баһ наста номт заав. Йирдән болхла башкир улсин тууҗ Өмн үзгин Уралд эклҗәсмн, эдниг күчәр исламин шаҗнд орулсмн гиҗ номт заав.
Яһад гихлә кесг зун җил хооран тер һазрин улс Дунд Азин орн-нутгудла өргнәр хәрлцҗәсмн, тиим кевәр XVI зун җил күртл ислам һоллгч шаҗн болсмн. Ода теднә регионд исламин элчнр талдан шаҗна улсла иньгллтин таалд нөкцлтән делгрүлҗәнә гиҗ Башкирин номт темдглв.
Цааранднь Новосибирск келн-улсин шаңһа ик сурһулин аспирант Руслан Сеитов эн төрәр ухан-тоолвран келв. «Намаг хамгин түрүнд Хальмг ик сурһулин баһчудын лабораторь соньмсулҗала, яһад гихлә мана вузд бас тиим лабораторь үүлдҗәнә, бидн Хол Дорд үзгин орн-нутгудын шаҗна өдгә цагин болн урдкин кесг төриг шинҗлҗәнәвидн, тегәд дамшлтарн хувалцснь йир соньн болв, хамцу көдлмшән хальмг номтнрла цааранднь күцәхвидн», – гиҗ күндтә гиич онц темдглснь тодлгдв.
Тиим кевәр Хальмг Таңһчин һардвр, нарт-делкән болн Әрәсән баһ наста номтнр Элстд Бурхн Багшин ном шинҗллһнә ик хург кех седвәриг дөңнҗ, терүнд шунлттаһар орлцҗ, делкән орн-нутгуд хоорндк нөкцлтиг болн иньгллтиг батрулхар седҗәнә. Хальмг Таңһчин хотл балһснд болх керг-үүлдвр Азийин болн цуг делкән орн-нутгудла Әрәсән нөкцлтиг цааранднь улм өргҗүлҗ, Хальмг Таңһчин делгрлтд нилчән күргәд бәәхнь лавта.

ТҮРВӘН Һуна