Зун наста ээҗиг йөрәв

Туула сарин 5-д Элст балһснд бәәдг Светлана Зулаевна Бамбышева 100 җилин ончта өөнән өргәр темдглҗ, олн ачнр-зеенрән, элгн-садан цуглулв. Хальмг Таңһчин Толһач Хаска Бату нәәрин күндтә гиич болад, ик ачта ээҗиг өөнләнь йөрәҗ, өнр-өсклң өрк-бүлин байринь хувалцв.
Бату Сергеевич Әрәсән Президент Владимир Путинә йөрәлин бичг умшад, ах үйин улс мана бахмҗ болҗахиг темдглв. «Мана көгшд аврлт уга дәәнә күчр зовлңгиг дааҗ һарад, Төрскән шинәс босхч, орн-нутгиннь делгрлтд ик ач-тусан күргв. Тана җирһлин хаалһ маднд үнн-чик седклтә, төрсн һазр-усндан эңкр болдгин үлгүр болна», гиҗ орн-нутгин толһачин йөрәлин үгд келгдҗәнә. Таңһчин Толһач эврәннь нерн деерәс Светлана Зулаевнад бат эрүл-менд дурдҗ, орсн шин җил өлзәтә, кишгтә болтха гиҗ йөрәһәд, килмҗән тусхаҗ ах үйин улсан күндлҗ иим сәәхн нәр бүрдәсн ээҗин олн элгн-саднд ханлтан өргв.
Светлана Зулаевна Көтчнр селәнд һарсмн. Дәәнә өмн эн Үлмҗ Зердеевд хәрд һарв, өркән өндәлһсн баһчудын җирһл нег агчмд сольгдад, кесг түрү-зүдү дааҗ һарх кем учрсиг медсн уга. Хальмг улсиг цааҗла харһулад Сиврүр нүүлһсн цагт эн авальтаһан болн хадм эктәһән Новосибирск мүҗин Чистоозерн района Мироновка селәнд тусв. Күүнә һазрт теҗәл алхин төлә мал хәрүлх, мод көрәдх, тәрә тәрх, урһц хурах кергтә бәәсмн. Сиврин һазрт эдн һурвн үрән геев, хойр көвүнь болн нег күүкнь тенд үлдв. Хальмг улсин нериг цевр дүләд төрскн һазрурн хәрх зөв өгхлә, эдн Приозерн (ода Көтчнрә) района Сухотинский селәнд нүүҗ ирв. Үлмҗ Богаевич болн Светлана Зулаевна үнн-чик седклтәһәр көдләд, отг-әәмгтән күндтә улс болҗ, күцәмҗтә күч-көлсәрн олнд бахмҗ үүдәҗ йовсмн. Эдн Анатолий, Юрий, Александр болн Зинаида күүкдтән чик сурһмҗ өгхәр шунҗ, эврәннь авг-бәрцәрн үлгүр болдмн. Герин эзн Көк Булг селәнә хүүвин ахлач, фермин залач, Приозерн районд ДОСААФ-ин әңгин һардач болҗ көдлҗ йовла. Светлана Зулаевна болхла, дөч һар җилдән Приозерн РайПО-д лавкч болҗ, нег һазра улс дунд тоомср олв.
- Мана эк цаһан седклтә, өөрнь бәәдг улст мел дөң-тусан күргхәр зүткдг, элгн-саднд, таньл-үзл әмтнд санань зовҗ, бәәсәрн хувалцдг билә. Нег һазра улс экимдн тевчҗ күндлнә, ода чигн мендинь сурҗ, золһҗ ирнә. Һундл төрхд, мини һурвн ах ода уга, экм нанла бәәнә. Арднь орҗ сәәнәр хәләҗ, шимтә хот белдәд, эрүл-мендинь батрулҗ эмнлһнә олн зүсн керг-үүлдвр кенәв. Олн ачнр-зеенрнь күүкдән дахулҗ ээҗдән дару-дарунь гиичд ирҗ байрлулна. Мана килмҗин, дурна, сән хәләврин нилчәр экм иим сәәхн наснд күрв. Бидн экдән, ээҗдән теңкән уга эңкрлҗ хәләнәвидн, - гиҗ Зинаида күүкнь келнә.
Герин эзн Үлмҗ Богаевич җирн җил шаху хооран сәәһән хәәв, тегәд Светлана Зулаевна күүкдтән эк, эцк чигн болад, өрк-бүлән теҗәв. Келхд, эн хадм экән Ноһан Баркаевнаг күндлҗ һарлдсн эклә әдл хәләв, ямр нег сән өдр болхла эрк биш белгән белглҗ, көгшәг байрлулдг бәәсмн. Сул цаг учрхла, олн үртә эк үүл бәрҗ, күүкдтән хувц уйҗ, өлгдг билә, ээҗән дураҗ ачнр-зеенрнь бас һартан өөтә болҗ өсв. Ода Светлана Зулаевна 12 ач-зеетә, 28 җич-зеенчтә болн хойр җичнцин ээҗ болад, эднә күцәмҗәр бахмтна. Ээҗин элгн-садн Хальмг Таңһчин Толһач Хаска Бату ончта өөнләнь йөрәҗ ирснд ик ханлтан өргҗәнә. Эднә өрк-бүлин ик байр хувалцад, эңкр экиг, ачта ээҗиг өөнләнь йөрәснь эднд бахмҗта йовдл болв.
ДООҖАН Наталья