Баахн эмчнр эмнлһсиг һардв

Шидр Хальмг Таңһчин Толһач Хаска Батун зааврас иштә Светлана Кусьминова шишлң дөң күрглһнә «Сулда» төвин болн Занда Адудова Яшалтан района эмнлһнә ах эмчнрин үүлд батлгдв. Баахн болв чигн эдн байн дамшлтта, эрүл-менд харлһна халхд арвн һар җилдән көдлҗ йовна.

Светлана Кусьминова Ростовск медицинск ик сурһуль төгсәһәд, хирургийин халхар интернатур болн ординатур төгсәсмн. И.Сеченовин нертә Москван Негдгч медицинск ик сурһульд аспирантурт сурад, медицинск номин кандидатын цолта болв. П.Жемчуевин нертә таңһчин эмнлһнд хирург болҗ күч-көлснә хаалһан экләд, 2-ч тойгта хирургическ әңгин һардач болн ах эмчин дарук болҗ көдлсмн. Сүл цагт шишлң медицинск дөң күрглһнә «Сулда» төвд көдлҗ, олн зүсн гемәс хөрлһнә кергиг чадмг кевәр һардҗ йовсмн.
Занда Адудова болхла, Әрәсән медицинск ик сурһульд эмчин эрдм дассмн. Занда Юрьевна П.Жемчуевин нертә таңһчин эмнлһнд зүркнә эмчәр күч-көлснә хаалһан эклв. Хөөннь эн Лаганя района эмнлһнд, Элст болн Лабытнанги балһсдын поликлиникүдт көдлсмн. Сүл цагт Городовиковск болн Яшалтан райодын эмнлһст зүркнә эмчәр көдлв. Занда Адудова мергҗлтән өөдлүллһнд ик оньг өгч, эрүл-менд харлһна бүрдәлһнә халхар немр сурһуль сурв, Әрәсән кардиологическ номин-хамцу бүрдәцин аспирант болна.
Баахн эмчнр һардсн эмнлһсин үүлдвриг күцәмҗтәһәр бүрдәҗ, әмтнд сән чинртә дөң күрглһнә төриг эрк биш хаһлх гисн итклтәһәр таңһчин һардвр эдниг дааврта үүлд батлв.

ДАВАН Наталья