Зөргтә кавалерист бәәсмн

Манурсн көк теегиг
Мандлсн нарн халулна.
Мөңгн иштә үлд
Мана һарт гилвкнә.

Даван Эрнцн 1914 җилд Әәдрхнә мүҗин Баһ Дөрвдә Һооҗур селәнд һарсмн. Эк-эцкнь зөвәр эрт сәәһән хәәсмн. Бичкн Эрнцн көвүн өнчрәд үлдв. Энд-тенд хонад, гермүд эргәд, өлн гесән цадхдг билә. Хөөннь нег элгн-саднь көвүг хармнад, бий талан авад асрсмн.
Әәдрхнә мүҗин Садовск района Көглтин эклц сурһулин һурвн класс төгсәснә хөөн эн экләд көдлв. 1936 җилд Әәдрхнә мүҗин Баһ Дөрвдә РВК-н шиидврәр 37-ч кавалерийск полкд мөрн цергә әңгд церглсмн. Хойр җил давад, РВК-н зәрлгәс иштә белдлһнә полкд йовулгдв.
1941 җилд дән эклхлә, така сарин 20-әс авн 1942 җилин ноха сар күртл 40-ч дивизин ханьд дәәлдсмн. Хөөннь болхла хаһачнрин полкд болн туршулын ротд бас церглҗ йовла.
Цергә хаалһнь кесг балһсар давҗ һарсмн. Севастополь, Мелитополь болн талдан балһсдыг Эрнцн Бокшаевич сулдхҗ йовла. Сапун-Уулыг харслһна нег ик бәрлдәнд Даван Эрнцн күндәр шавтв. Шаван эдгәснә хөөн хәрү эврәннь полкд ирҗ дәәлдв. Ар Кавказин, Украинә һазриг болн Төрскнәннь нань чигн меҗә болһниг сулдхад, зөргтәһәр дәәлдҗ йовснь темдгтә.
Цергә даалһвран күцәһәд, 1943 җилд фронтын һардврин шиидврәр Даван Эрнцн «Дәәнд ик тәвцән орулсн төлә» медаляр ачлгдсмн. Хөөннь 1944 җилд Широклагд эн тусв. Муулян эдләд, ик зовлң үзәд, 1945 җилд Сиврүр туугдсн билә. Тенд Новосибирск мүҗин Андреевск районд туссмн. Мөрчәр, ө-шуһуд модна эдл-ахуд бас көдлв, көрә һазриг сүкәр цокч малтдг болн нань чигн олн зүсн көдлмш кедг билә. Ямр чигн күнд көдлмшәс әәлго мана хальмгуд араһан зуучкад, энд-тенд көдләд йовсмн.
1957 җилд Даван Эрнцн өрк-бүлән өндәлһв. Авальтаһан хамдан һурвн үртә болсмн. Зуг теднәснь көвүн күүкн хойр әмд үлдв. Цаг негәр бәәдго, XX чуулһна һалын очн хальмгудын киитрҗ одсн чееҗиг халулад байр үүдәсмн. Тер җилд Эрнцн Бокшаевич өрк-бүлтәһән, элгн-садтаһан Приозерн (ода Көтчнрә) района Көглт селәнд нүүҗ ирв. Тенд мал өсклһнә халхар көдлсмн. Хөөннь үкрчәр көдләд, тоомсрта, күндтә малч болв. Күцәмҗтәһәр, үнн-чик седклтәһәр көдлсн төләдән кесг ачлврмудар темдглгдсн билә.
Зөргтә дәәч, бууһарн чигн хадг, чашкарн чигн чавчдг зөрмг хальмг залу-баатр Даван Эрнцн 1985 җилин мөчн сарин 29-д далн негн насндан сәәһән хәәв. Көглт селәндән аваль Пелагея Басанговнан өөр оршагдсмн.

БАДМИН Римма, Хальмг Таңһчин ачта багш, педагогическ күч-көлснә ветеран